Gjykata e Apelit në Tiranë ka lënë në fuqi masën e pezullimit nga detyra të ish-zëvendësdrejtorit të OFL-së, Artan Shkëmbi. Ky i fundit është nën hetim për veprat penale “korrupsion” dhe “nxjerrje sekreti hetimor”. Sipas prokurorisë, Shkëmbi dyshohet se ka dhënë informacione tek dy trafikantët shqiptarë, Aleksandër Prroni e Klaudio Vukajn. Informacioni për nisjen e hetimeve ndaj Shëkmbit u dha fillimisht nga autoritetet gjermane, të cilët thanë se trafikantët janë lajmëruar nga Shkëmbi se ishin vënë në hetim për verifikimin e pasurisë.
“Në datë 21.07.2021, në Gjykatën e Apelit Tiranë, u zhvillua gjykimi lidhur me caktimin e masës së sigurimit për personin nën hetim A.Sh, i dyshuar për kryerjen e veprave penale ‘Zbulimi i akteve ose të dhënëvae sekrete’ dhe ‘Korrupsioni pasiv i personave që ushtrojnë funksione publike’, parashikuar nga neni 295/a dhe 259 të Kodit Penal. Shtetasi A.Sh., është punonjës policie dhe dyshohet për nxjerrje dhe dhënie informacioni personave të interesuar nga sistemi Deepsee.
Lidhur sa më sipër, Gjykata e Rrethit Gjyqësor Tiranë me vendimin nr. 459/4 Akti, datë 15.07.2021 ka vendosur: -Përsëritjen e së sigurimit personal ndalues 'Pezullimin e ushtrimit të një detyre apo shërbimi publik' për personin nën hetim A.SH. Çështja në apel u shqyrtua mbi bazën e ankimit të bërë nga personi nën hetim A.SH. Gjykata e Apelit Tiranë me vendimin nr. 656 datë 28.07.2021 vendosi: - Lënien në fuqi të vendimit nr. 459/4 Akti, datë 15.07.2021 të Gjykatës së Rrethit Gjyqësor Tiranë”, thuhet në vendim.
Kujtojmë që atë kohë, autoritetet gjermane u kanë kërkuar autoriteteve shqiptare verifikim të pasurisë për të dy trafikantët të cilët qëndrojnë në Gjermani. Pala shqiptare u kthen përgjigje më 22 prill. Por nga hetimet të bëra nga një grup i përbashkët hetuesish të quajtur Kier Gier u gjetën bisedat mes trafikantëve shqiptarë në Gjermani nëpërmjet programit të paligjshëm Encro Chat. Në telefonin e tyre u gjet fotografia e dërguar nga Shqipëria me të dhëna nga programi hetimor i autoriteteve gjermane në të cilën kanë akses vetëm organet hetimore të certifikuara. Pasi morën këtë informacion, në shtator oficeri ndërlidhës gjerman kërkoi hetime nga autoritetet shqiptare pasi ishte i bindur se tradhtari ishte efektiv i policisë shqiptare. Në të dy rastet personi që kishte kërkuar rezulton zyrtari Shkëmbi, të cilit për vite me radhë i janë besuar aksione ndërkombëtare të forta.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
