Silvio Berluskoni vijon përpjekjet për të bindur Antonio Tajanin të pranojë rolin e kryeministrit në rast të fitores së të djathtës në zgjedhjet e 4 marsit në Itali. “Mungon vetëm përgjigjja e tij pozitive”, tha lideri i Forza Italias pak ditë më parë. Por në një intervistë për “Die Welt”, Tajani është shprehur se do të qëndrojë në postin e presidentit të Parlamentit Europian.
“Të gjithë e kuptojnë që ai do të ishte një kandidat i shkëlqyer sepse Italia nuk ka sot asnjë peshë në Europë dhe në botë. Me të do të kishte shumë më tepër, pasi konsiderohet si presidenti më i mirë që ka pasur PE”, tha Berluskoni për “6 su Radio 1”.
Por Tajani duket se nuk ka ambicie për të qenë kryeministër i Italisë. “Do të doja të mbetesha president i Parlamentit Europian, është e rëndësishme për Italinë kjo”, ka thënë Tajani në një intervistë për “Die Welt”. Tajani është shprehur i nderuar me këtë propozim, por ka shtuar se do të bëjë gjithçka për të punuar në interes të Europës.
Vetë Berluskoni nuk mund ta ushtrojë funksionin e kryeministrit për shkak të dënimit për mashtrim me taksat, që i ndalon të jetë në pozicione drejtuese shtetërore për një periudhë kohe.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
