Policia e Elbasanit njofton se ka zbardhur ngjarjen ku pretendohej se ishte hedhur lëndë plasëse në një lokal në Përrenjas, në pronësi të ish-sekretarit të Partisë Demokratike.
Nga hetimet rezultoi se në verandën e lokalit të shtetasit Dhimitër Kokonozit, nuk është hedhur lëndë plasëse tritol, por një granatë dore.
Ndërkohë janë arrestuar dy autorët e dyshuar, njëri prej të cilëve me precedent të theksuar kriminal, në Shqipëri dhe në Itali, për vepra penale në fushën e krimeve ndaj personit dhe pronës.
Specialistët për Hetimin e Krimeve të Komisariatit të Policisë Librazhd, nën drejtimin e Prokurorisë pranë Gjykatës së Rrethit Gjyqësor Elbasan, falë veprimeve të shpejta hetimore dhe profesionale, në vendngjarje, me qëllim grumbullimin e çdo prove për zbardhjen dhe dokumentimin e kësaj ngjarjeje, identifikuan, shoqëruan dhe ndaluan shtetasit:
R. K., 23 vjeç dhe A. P., 41 vjeç, të dy banues në lagjen Nr. 2, Përrenjas, Librazhd. Nga veprimet hetimore të deritanishme rezulton se këta 2 shtetas, në bashkëpunim me njëri-tjetrin, janë autorët e dyshuar të hedhjes së një granate dore, në verandën e lokalit të shtetasit Dhhimitër Kokonozi.
Në cilësinë e provës materiale, u sekuestruan dy aparate celulare. Aktualisht vijon puna, nën drejtimin e Prokurorisë, për dokumentimin e plotë të motivit dhe të rrethanave të kësaj ngjarjeje.
Lidhur me këtë rast materialet procedurale i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme hetimore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
