Rama i përgjigjet Dumës: 800 kwh shkojnë 9220 lekë, jeni aritmetikisht të vajtueshëm

Kryeministri Edi Rama ka publikuar një faturë të energjisë elektrike për të treguar sesa do të paguajë një familje e cila harxhon 800 kwh.

Gjithashtu, Rama duke iu referuar një deklarate të sotme të deputetes Grida Duma, theksoi se, fatura tregon se sa reale, konkrete, aritmetikisht e vajtueshme është kriza e thellë logjike e ulëritësve profesionistë, në politikë e në media.

 Sipas faturës së bërë publike nga Rama, për 800kwh, familja do të paguajë 9220 lekë.

Çmimi i kilovatit është 9.5 lekë, por duke shtuar tarifën standarde 100 lekëshe e 20% të TVSH-së, ky çmim shkon në 11.4 lekë.

“Ja një faturë reale, konkrete, aritmetikisht e pakontestueshme, që tregon se sa kushtojnë 800këh dhe se sa reale, konkrete, aritmetikisht e vajtueshme është kriza e thellë logjike e ulëritësve profesionistë, në politikë e në media”, shkruan Rama krah faturës.

Më herët, deputetja e Partisë Demokratike, Grida Duma ka reaguar lidhur me paketën e re të rezistencës sociale.

 Duma shkruante se me çmimin e re të energjisë shqiptarët që më parë kanë paguar mbi 6100 lekë (800 kwh) tashmë do të pagujnë 4.4 herë më shumë para.