Sot, Gjykata e Apelit pritet të japë vendimin përfundimtar për vulën e Partisë Demokratike. Nw seancwn e cila pritet të nisë në orën 11:00, do të vendoset për vulën e partisë më të madhe opozitare në vend nëse do të jetë në duart e Enkelejd Alibeajt apo Sali Berishës.
Gjykata e Apelit do të vendosë mbi ankimimin e Alibeajt ku kërkohet rrëzimi i vendimit të gjyqtarit Agron Zhukri për njohjen e kuvendit 18 dhjetorit si legjitim.
Po sot, ish kryeministri ka thirrur protestë kombëtare por që sipas tij nuk ka të bëjë me vendimin e gjykatës por me rrëzimin e qeverisë Rama.
Tubimi është njoftuar të mbahet në orën 12:00 me sloganin “Shqipërisë i dalim Zot”.
Teksa protesta kombëtare e thirrur para kryeministrisë do të nisë në orën 12:00, rrugët do të bllokohen nga ora 10:00 deri në fund të tubimit.
Rrugët ku do të bllokohet qarkullimi: Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i Rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D'Ark" dhe bulevardi "Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
Kujtojmë që deri më 6 mars, është afati i lejuar nga KQZ-ja për regjistrimin e partive politike në zgjedhjet vendore dhe fati i PD-së, duhet doemos të vendoset sot për të kapur kësisoj afatin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
