Njëzet e gjashtë shoqata mjedisore kanë ngritur shqetësimin e tyre për gërryerjet pa kriter të shtratit të lumenjve. Kjo situatë ditët e fundit ka sjellë edhe dëmtimin e rrugës Elbasan-Librazhd-Bushtricë duke bllokuar udhëtimin drejt juglindjes. Në studion e MCN Informacion, Gëzim Shuli, drejtues i organizatës “Albnatyra” dhe Besjana Guri, drejtuese e qendrës “Lumi”, thanë se shtrati i Shkumbinit është shfrytëzuar tej kapaciteteve dhe kjo ka sjellë si pasojë rritjen e forcës gërryese, që rrezikon të gjithë zonën.
Gëzim Shuli
Thellësia e shtratit të Shkumbinit është ulur rreth 1-2 m në disa zona. Ka rritur rrëmbyeshmërinë dhe ka sjellë si pasojë rrëshqitje dherash. Ka rrëshqitje të tokave bujqësore, të urës, rrugës. Nuk mund t’ia lëmë natyrës. Shkumbini është lumë i rrëmbyeshëm. Duke e rritur rrëmbyeshmërinë e tij, kjo do të ndikojë edhe në tokat përreth. Përgjatë gjithë segmentit nga Bushtrica deri afër Polisit, e gjithë zona është e rrezikuar.
Besjana Guri
Ne e kemi ngritur si problem, por në vendin tonë po nuk pati katastrofë nuk ka reagim të mirëfilltë. U desh bllokimi i rrugës që të prekej tematika e gërryerjes së lumit. Ne jemi munduar të unifikojmë zërin dhe ta përcjellim shqetësimin tonë përmes një letre të hapur që u publikuar një ditë pas shembjes së madhe. Janë 26 organizata që kanë kërkuar inspektime në zonë, monitorime, si po trajtohet shtrati i lumit, cilat janë dëmet mjedisore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
