Alarmin për ikjen masive të të rinjve nga vendet e rajonit e dha në Tiranë edhe Majlinda Bregu. Si drejtuese e konferencës së 16-të rajonale për integrimin evropian, ajo raportoi mbi shifrat shqetësuese si nga Shqipëria, ashtu edhe nga vendet fqinje.
Majlinda Bregu: “Jemi në një presion të jashtëzakonshëm të zhvendosjes së popullsisë nga rajoni i Ballkanit Perëndimor. Të paktën vetëm në pesë vitet e fundit, një e treta e popullsisë së rajonit është larguar nga vendet e tyre. 61% e të rinjve në rajon deklarojnë se janë pro integrimit europian të vendeve të tyre dhe shpresojnë që e ardhmja europiane e vendeve të tyre do të përmirësojë jetën dhe sigurisht do t’u ndryshojë faqen realitetit që jetojnë çdo ditë. Por ndërkohë po 61% e tyre janë gati që të largohen nga vendi në rast se kjo gjë nuk ndodh.”
Përfaqësuesi i mazhorancës, Taulant Balla, kritikoi Brukselin për zvarritjen e integrimit.
Taulant Balla: “Përgjegjësia për mosmarrjen e vendimit për çeljen e bisedimeve me Shqipërinë dhe Maqedoninë e Veriut është tërësisht çështje e brendshme e Bashkimit Europian, madje e lidhur edhe me pasigurinë e ardhur si pasojë e këtij mosvendimi që duhet adresuar sa më parë. Kush është kundër Shengenit rajonal nuk e kupton aspak procesin e integrimit europian.”
Edhe kryetari i Kuvendit, Gramoz Ruçi, që pak muaj më parë fajësoi Holandën për gjendjen e kanabisit në Shqipëri tha se vendet e rajonit nuk duhet të shihen me sy skeptik nga ndërkombëtarët.
Gramoz Ruçi: “Rajoni ynë është një rajon europian dhe nuk ka pse konsiderohet prej disa udhëheqësve europianë si delja e zezë, por si një vlerë e shtuar në familjen europiane. Integrimi ynë europian e ka një model që mund dhe duhet ta ndjekë. Ai është integrimi i disa nga vendeve tona në Nato, por për fat të jkeq ende s’ka një perspektivë të qartë drejt BE-së.”
Shqipëria do të ketë një tjetër shans në muajin maj për çeljen e negociatave. Deri atëherë, vendi ynë duhet të ketë përmbyllur reformën zgjedhore dhe të ecë përpara me reformat e tjera.
Por sa besojnë të rinjtë se vendi i tyre mund t’u ofrojë një të ardhme më të mirë për karrierën dhe ambiciet e tyre? Të dhënat flasin për ikje masive të një brezi që kërkon të shkollohet dhe të punojë jashtë vendit. Arsyet sipas tyre janë nga më të ndryshmet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
