Qeveria është në fazën e përgatitjes së ndryshimeve të ligjit “Për komunikimet elektronike”, i cili i jep të drejtë Shërbimit Informativ Shtetëror të ketë akses të drejtpërdrejtë në tabulatet e komunikimit mes përdoruesve të telefonisë. Nisma mban firmën e ministres së Inovacionit, Milena Harito, dhe ministrit të Brendshëm, Saimir Tahiri, raporton “Shqiptarja.com”.
Ndryshimet parashikojnë që për ruajtjen e sigurisë kombëtare dhe luftën ndaj terrorizmit, kompanitë celulare dhe të telefonisë fikse detyrohen që brenda 24 orëve të vendosin në dispozicion të SHISH-it bisedat e kërkuara prej këtij të fundit. Në datën 18 nëntor 2016, ajo është nisur për konsultim në disa ministri, pranë SHISHit, Prokurorisë së Përgjithshme, AKEP, etj. Por “Shqiptarja.com” ka mësuar se Ministria e Drejtësisë nuk e ka mbështetur këtë projektligj me dy argumente: cenimin e privatësisë së përdoruesve të telefonisë, dhe mungesës së garancisë ligjore që këto përmbajtje bisedash elektronike apo telefonike nuk do të keqpërdoren.
Në relacionin shoqërues, dy ministrat Harito e Tahiri shprehen se ky ndryshim që përfshinë dhe SHISHin tek institucionet që mund të administrojnë tabulatet, vjen në kuadër të forcimit të rendit dhe sigurisë në vend. “Në pikën 8, parashikohet që të dhënat operative të identifikimit të pajisjes, pajtimtarit dhe vendndodhjes, për nevoja të ruajtjes së sigurisë publike dhe kombëtare, parandalimit të krimeve të rënda apo akteve terroriste, t’ju vihen në dispozicion mbi bazën e kërkesës brenda 24 orëve, dhe shërbimeve informative dhe të inteligjencës, Policisë së Shtetit dhe Policisë Ushtarake”,thuhet në relacion.
Ky projektligj nuk është mirëpritur nga Ministria e Drejtësisë. Ministri Manjani i ka dërguar ministres Harito në 5 dhjetor një dokument, ku shpreh rezerva serioze ndaj kësaj nisme. “Kjo do të sillte një përkeqësim të pariparueshëm të nivelit të ruajtjes së fshehtësisë së komunikimeve dhe të dhënave personale, për sa kohë aksesi u jepet organeve ekzekutive të emëruara pa asnjë ndërhyrje në organet kushtetuese. Këto parashikime nuk e kanë kufizuar detyrimin e ruajtjes së të dhënave. Gjykojmë se duhet të ishin parashikuar llojet e veprave për të cilat mund të kërkohen këto të dhëna, pasi në të kundërt gjithë procesi rrezikon të kthehet në abuzim, nisur nga fakti se për cdo dyshim apo të dhënë lidhur me një lloj vepre penale, propozohet të jepet e drejta për të kërkuar këtë informacion. Përfundimisht sugjerojmë rivlerësimin e nismës”,thuhet në shkresën e Ylli Manjanit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
