Sot në Stamboll do të nënshkruhet një marrëveshje për zhbllokimin e eksportit të drithërave nga portet e Ukrainës, marrëveshja e parë reale mes palëve që nga fillimi i luftës, më 24 shkurt të kaluar.
Detajet e marrëveshjes në zhvillim, të ndërmjetësuar nga Kombet e Bashkuara dhe Turqia me Rusinë dhe Ukrainën, nuk janë bërë ende të ditura dhe deklarata e Turqisë u prit me kujdes nga zyrtarët ukrainas.
Në deklaratë thuhet se marrëveshja do të nënshkruhet në orën 16:30 me orën lokale (9:30 të mëngjesit ET) nga palët ukrainase dhe ruse, presidenti turk Rexhep Taip Erdogan dhe Sekretari i Përgjithshëm i OKB-së, António Guterres.
Zyrtarët turq, ukrainas dhe rusë zhvilluan bisedimet e fundit me mbështetjen e OKB-së për çështjen e eksporteve të grurit më 13 korrik.
Priten më shumë bisedime përpara se të nënshkruhet marrëveshja, ka paralajmëruar një zyrtar i lartë ukrainas.
“Pas negociatave, një dokument mund të nënshkruhet, që do të përmbajë detyrimet e palëve në lidhje me funksionimin e sigurt të rrugëve të eksportit në Detin e Zi”, tha të enjten Oleg Nikolenko, zëdhënës i Ministrisë së Punëve të Jashtme të Ukrainës.
Nikolenko theksoi se delegacioni ukrainas "do të mbështesë vetëm ato vendime që do të garantojnë sigurinë e rajoneve jugore të Ukrainës, pozicionet e forta të Forcave të Armatosura të Ukrainës në Detin e Zi dhe eksportin e sigurt të produkteve bujqësore ukrainase në tregjet botërore. "
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
