21-vjeçari Harry May, i cili qëlloi me vezë Mbretin Charles III të Anglisë, gjatë vizitës së monarkut në Luton, Berdfordshire më 6 dhjetor, u shpall fajtor.
Ai u dënua të premten me një gjobë prej 100 paund, si dhe 75 të tjera për mbulimin e shpenzimeve gjyqësore, pasi u shpall fajtor për prishje të rendit publik.
Charles po shtrëngonte duart me të pranishmit që kishin ardhur për ta përshëndetur, kur i riu nisi të qëllojë me vezë drejt tij, edhe pse asnjëra prej tyre nuk e arriti objektivin.
Gjatë arrestimit, May e justifikoi goditjen duke e akuzuar Mbretin Charles për “shije të keqe”, për shkak se kishte shkuar në një zonë të varfër dhe me veprimin e tij donte që ta ndërgjegjësonte.
Avokati i May, Alex Benn, deklaroi në gjykatë se klienti i tij është i kujdesshëm ndaj komunitetit ku jeton dhe se i vjen thellësisht keq për atë që bëri.
Kjo është hera e dytë që monarku i ri i Britanisë përballet me një situatë të tillë, pasi një student 23-vjeçar u arrestua në nëntor pasi hodhi vezë ndaj tij dhe bashkëshortes Camilla gjatë një vizite në York City për zbulimin e një statuje për nder të Mbretëreshës së ndjerë, Elizabeth.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
