Soko: Pa remitancat do kishte varfëri ekstreme në Shqipëri. Varësia, tregues i një vendi të prapambetur dhe keqqeverisur

Eksperti i ekonomisë Pano Soko tha në “MCN Economy” se varësia nga remitancat në Shqipëri është tregues i një vendi të pazhvilluar, të prapambetur dhe të keqqeverisur.

Ai theksoi se  nëse nuk do ishin paratë e remitancave, në Shqipëri do të kishte varfëri ekstreme. 

“Ka pasur edhe vjet remintanca, kemi edhe sivjet. Nuk do ishte tundur kaq shumë kursi i këmbimit vetëm nga këto lekë. Ne kemi shtuar rreth 60 milionë sivjet. Është i papërfillshëm komplet. Remitancat në vetvete pavarësisht se aty ka hapësirë për të qenë të pasaktë. Unë personalisht e konsideroj zyrtare, reale shifrën që me jep BSH, duke pasur hamendësimet e tjera. Që prej vitit 2015 kemi një rritje të numrit të prurjeve. Cikli i vjetër i emigrimit është shkëputur nga Shqipëria. Është hapur një cikël i ri emigrimi. Jemi në pikun e ciklit të dytë të emigrimit. Emigrantët që nisin nga vitit 2009 e këtej. Rritja e ritmit në vitet 2016, 2017, 2019....Një rol luan edhe zhvlerësimi i parasë. Nuk ka më të njëjtën vlerë paraja. Edhe dërgesat janë të kondicionuara nga kërkesat që janë nga brenda. Edhe me 1 mijë euro thotë familja, s’ia dalim dot me këto që na sjell”, tha Soko. 

“Është tregues i vendeve të pazhvilluara dhe të keqqeverisura. Remitancat janë 5 për qind të PBB-së. Në pamje të parë duket sikur nuk është shumë. Nga 50 për qind e qytetarëve shqiptarë që do të duhet të kontribuonin në Shqipëri, nga këta 2 milionë, marrim vetëm 5 për qind. Nëse heqim remitancat këtu varfëria shkon 60-70 për qind. Niveli i mbijetesës shkon në nivele marramendëse. Remitancat plotësojnë disa boshllëqe që qeveria shqiptare nuk i plotëson dot. Nuk jetohet në Shqipëri me 300 mijë lekë të vjetra pension. Mënyra e keqqeverisjes ka krijuar këtë realitet, ku 50 për qind janë detyruar të largohen nga Shqipëria, dhe kontributi i tyre katandiset në 5 për qind të PBB-së. Nëse do të ishin në Shqipëri do kishim të paktën 40 miliardë dollarë. Ndërkohë kemi vetëm 20 miliardë. Na mungojnë iniciativat e tyre, do kishte hapur biznes dikush, do kishte qenë edhe i suksesshëm. Një vend i varur nga remitancat tregojnë prapambetjen e vet. Një pensionist në fshat merr 80 mijë lekë të vjetra! Çfarë mund të blejë me 2600 lekë në ditë?!”, shtoi ai. 

Lidhur me të drejtat e emigrantëve, Soko tha se e drejta e votës është më relevantja, por që lihen enkas jashtë pasi kemi të bëjmë me njerëz të lirë dhe të pakontrollueshëm.

"E drejta e votës së emigrantëve është shumë relevante. Kam përshtypje se lihet enkas jashtë të drejtës për të shprehur gjithë trupa e emigrantëve shqiptarë. Janë një forcë e pakontrollueshme, sepse janë njerëz të lirë, nga vargonjtë që të jep jeta në Shqipëri. Jam totalisht pro votës së emigrantëve, sepse janë njerëz të lirë që e ndërtojnë opinionin e tyre mbi atë çka ata besojnë. S’kanë frikë nga tatimorët shqiptarë, sepse s’jetojnë në Shqipëri", tha ai.