Një nga zhvilluesit kryesorë të vaksinës ruse të koronavirusit Sputnik-V, Boris Naroditsky, është ndarë nga jeta në moshën 82-vjeçare, njoftoi të enjten studiuesi kryesor i Qendrës Kërkimore të Epidemiologjisë dhe Mikrobiologjisë Gamaleya, Anatoly Altstein.
Virologu nuk specifikoi shkakun e vdekjes së Naroditsky, të cilin ai e quajti “krijuesin kryesor të vaksinës Sputnik-V”.
Vdekja e tij u konfirmua edhe nga kreu i Qendrës Kërkimore Gamaleya, Alexander Gintsburg, i cili e quajti atë një humbje të madhe, duke pranuar se shpesh ishte konsultuar me Naroditsky për tema të ndryshme, duke përfshirë problemet shkencore dhe çështjet organizative.
Zëvendësdrejtori i Qendrës Gamaleya, Denis Logunov, i cili më parë ishte student i Naroditsky, vuri në dukje gjithashtu se shkencëtari ishte “babai themelues” i platformës së vektorit të adenovirusit njerëzor, i cili shërbeu si bazë për zhvillimin e Sputnik-V në 2020.
Profesor Naroditsky, i cili mbante një doktoraturë në shkencat biologjike, kishte kryer kërkime mbi vektorët e bazuar në adenovirus që nga vitet 1980. Në vitin 2002, ai filloi të punojë në Institutin e Virologjisë Ivanovsky- një njësi e Qendrës Gamaleya.
Atje, ai shërbeu si studiues kryesor dhe drejtues i Departamentit të Gjenetikës dhe Biologjisë Molekulare të Baktereve, duke u bërë më vonë zëvendësdrejtor i qendrës për punën shkencore.
Gjatë gjithë karrierës së tij, Naroditsky kishte shkruar mbi 200 punime shkencore dhe kishte mbi 20 certifikata të së drejtës së autorit dhe patenta për shpikjet e tij.
Për punën e tij në zhvillimin e vaksinës Sputnik-V, Naroditsky iu dha Urdhri i Nderit për kontributin e tij në kujdesin shëndetësor kombëtar.
Në gusht 2020, vaksina Sputnik-V Covid-19 u shpall nga Presidenti rus Vladimir Putin si një nga të parat që u zhvillua në botë. Që atëherë, ilaçi, i cili ka treguar deri në 97.8% efikasitet pa asnjë efekt negativ serioz, ka vaksinuar miliona njerëz në afro 70 vende që kanë miratuar përdorimin e tij, duke përfshirë Argjentinën, Indinë, Serbinë, Hungarinë, Filipinet dhe Emiratet e Bashkuara Arabe.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
