Kryeministri Ramush Haradinaj e ka cilësuar si ‘lajm të madh’ atë që do ta sjellin përfaqësuesit e BE-së në qershor. Sipas tij, kjo është një nga pjesët më kryesore të procesit të liberalizimit.
Kreu i qeverisë së Kosovës ka konfirmuar se takimi me përfaqësuesit e BE-së është paraparë të bëhet brenda 10 ditëve të ardhshme.
“Në 10 ditë që vijnë, ne kemi paraparë një takim me përfaqësuesit e BE dhe më pas t'i kthehemi axhendës evropiane. Në qershor vjen lajmi i madh, por nuk përfundon aty, e pas kësaj duhet të fokusohemi në punët nacionale”, ka thënë Haradinaj.
E për këtë proces, Haradinaj ka kërkuar ndihmën e të gjithëve. Përveç që medieve i shkroi letër ditë më parë, ai sot ka ftuar elitën nga sporti e muzika që të bëjnë të njëjtën gjë.
“Na duhet ndihma e të gjithëve. Ftoj elitën tonë qoftë nga sporti, muzika e gazetarët që të kontribuojnë në këtë proces”, ka shtuar kryeministri.
Ky takim i përfaqësuesve të BE-së me zyrtarët kosovarë rreth procesit të vizave, nuk është i pari. Zyrtarët e BE-së ishin para disa javësh në Kosovë ku analizuan disa procese dhe dhanë sugjerimet e fundit.
Ndryshe, sipas njohësve dhe udhëheqësve shtetërorë, në qershor Kosova merr vulën rreth procesit të liberalizimit, i cili ka pak gjasë të ndodhë në shtator, e më shumë gjasë ka që të ndodhë në dhjetor.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
