Ndryshimet në Ligjin për vetingun në Policinë e Shtetit, pritet të votohen sot nga shumica parlamentare në Kuvend, por ai nuk ka kaluar pa debate nga ana e vetë maxhorancës. Skeptik për ndryshimet e këtij ligji është shfaqur sot ish-ministri i Brendshëm Fatmir Xhafaj, i cili gjatë mandatit të tij ishte ndër nismëtarët për “veting” të të gjithë policisë së vendit. Kësisoj, Xhafaj doli kundër projektligjit të maxhorancës, i cili ndryshon ligjin aktual të vetingut në Policinë e Shtetit.
Edhe pse ligji në fjalë është kërkuar për rishikim për ndryshime eventuale nga ana e pasardhësit të tij, ministrit aktual Sandër Lleshaj, ish-ministri Xhafaj shprehu keqardhje për alibitë false, që sipas tij u përdorën për moszbatimin në kohë të mëparshme të ligjit të vetingut në polici.
Projektligji i ri i konsiston në dy pika kryesore, të cilat priten të ndryshohen, e që kanë të bëjnë me afatin dhe komisionet që kanë të bëjnë me vetingun. Në projektligjin e ri të ndryshuar parashikohet që vetingun në policinë e shtetit, në fazën e parë për drejtuesit ta bëjë një komision i jashtëm, ndërsa 13 mijë punonjësit e policisë t'i kalojë në skaner Shërbimi për Çështjet e Brendshme dhe Ankesat.
Pikërisht për këtë çështje, Xhafaj, shpreh skepticizmin e tij, qe institucioni në fjalë nuk mund të bëjë një filtër të tillë, pasi e para është në varësi të ministrit dhe mund të cenohet pavarësia e procesit dhe e dyta, sepse SHÇBA-ja nuk ka kapacitetet e nevojshme:
"Një nga sukseset e vetingut në drejtësi është se është i besueshëm nga të gjithë. Së dyti cenohet cilësia dhe shpejtësia e procesit. SHÇBA-ja nuk ka kapacitetet për ta kryer këtë proces. T'i besojmë vetingun 13 mijë punonjësve një institucioni që ka 100 punonjës vlerësoj se do ta ngadalësojë procesin. Argumenti financiar nuk është i justifikuar, ajo shumë që mendohet se do të kursehet 2 mln euro, është e papërfillshme nga ajo që pritet. Por një gjë është pozitive, nuk preket thelbi i vlerësimit dhe kriteret", u shpreh ish ministri Xhafaj.
Por sipas ministrit të Brendshëm, Sandër Lleshaj, ndryshimet e propozuara nuk prekin thelbin e procesit të vetingut, por bëhen më qëllim të përshpjetimit të procesit. "Problemi themelor që lidhet me këtë situatë ka të bëjë me kohën, e cila është në dispozicion për të mbyllur procesin e vetingut. Sipas ligjit aktual, procesi i vetingut për 13 mijë punonjës të Ministrisë së Brendshme duhet të mbyllet në marsin e vitit të ardhshëm, ndërkohë që procesi ende nuk ka filluar dhe praktikisht është e vështirë, për të mos thënë e pamundur, që ky proces të mbyllet ashtu sikundër ligji e parashikon, pra në marsin e vitit të ardhshëm", tha ministri Lleshaj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
