Reshjet / Të gjitha akset rrugore janë të kalueshme

Ministria e Transportit njoftoi në mbrëmje se të gjitha akset rrugore janë të kalueshme. Sipas burimeve zyrtare në disa akse rrugore ka patur rrëshqitje të materialeve të ngurta në trupin e rrugës, por është bërë e mundur nga kompanitë kontraktore për mirëmbajtjen e e rrugëve pastrimi i tyre.

MTI bën të ditur edhe disa nga asket rrugore që paraqitën probleme gjatë ditës së sotme në të cialt është ndërhyrë. Ka patur probleme në aksin Tepelenë- Gjirokastër te Uji i Ftohtë, ku ka ndodhur rrëshqitja e një masivi shkëmbor dhe pas ndërhyrjes së kompanisë së mirëmbajtjes situata është normalizuar.

Po ashtu ka patur vështirësi qarkullimi edhe në aksin Gjirokastër-Kakavijë si rezultat i vërshimit të ujrave mbi rrugë, por është ndërhyrë duke bërë të mundur normalizimin e qarkullimit. Situatë problematike ka qenë edhe grumbullimi i ujrave pranë City Park, autostrada Tiranë-Durrës, ku rrezikohej përmbytja e dhjetra bizneseve. Situata tani sipas MTI-së është normalizuar, pas ndërhyrjeve.

Një masiv shkëmbor ka rënë edhe në aksin Librazhd-Prrenjas ku fillimisht trafiku u lejua vetëm në një korsi dhe pas ndërhyrjes së firmës së mirëmbajtjes situata u vu nën kontroll dhe qarkullimi i mjeteve bëhet normalisht. Probleme serioze paraqet Rruga e Kombit ku janë aktivizuar disa skarpata të përmasave të mëdha dhe që kërkojnë vëmendje për ndërhyrje. Gjithsesi kalimi i mjeteve në këtë aks nuk ka probleme. Dëmtime të rënda ka pësuar rruga Bajram Curri-Valbonë ku qarkullimi kryhet me vështirësi. MTI bën të ditur se kompanitë e mirëmbajtjes janë në terren duke monituar situatën.