Supermakineria e Meta tashmë mund të përkthejë më shumë gjuhë afrikane

A e kuptojnë makineritë Afrikën? Kjo është pyetja që Meta filloi t'i përgjigjet këtë muaj kur publikoi një punim kërkimor që detajon planet për të përmirësuar saktësinë me të cilën algoritmet e AI (laboratort të inteligjencës artificiale) deshifrojnë gjuhët afrikane.

Plani, që pritet të analizojë 55 nga gjuhët e margjinalizuara të Afrikës dhe të përmirësojë mënyrën se si makinat e AI i përkthejnë ato në Facebook, Instagram dhe Wikipedia, mund të nxisë në zgjidhjen e disa problemeve teknologjike të Afrikës.

Shefi ekzekutiv Mark Zuckerberg publikoi në profilin e tij në Facebook se kompania e tij do të përdorë një superkompjuter për të udhëhequr përkthimet përmes aftësive të avancuara të Përpunimit të Gjuhës Natyrore (NLP) .

“Ne gjithashtu punojmë me përkthyes profesionistë për të bërë vlerësimin njerëzor, që do të thotë se njerëzit që flasin gjuhët vlerësojnë atë që prodhon AI. Realiteti është se një pjesë e vogël e gjuhëve dominojnë në internet, kështu që vetëm një pjesë e botës mund të hyjë në përmbajtje dhe të kontribuojë në gjuhën e tyre. Ne duam ta ndryshojmë këtë”, shpjegon ai.

Aktualisht, rreth 4 miliardë njerëz nuk mund të përdorin shërbimet e internetit për shkak se gjuhët e tyre janë të margjinalizuara dhe nuk flasin një nga gjuhët e pakta që disponohet në aplikacione.

“Modelet e AI kërkojnë shumë të dhëna për t'i ndihmuar ata të mësojnë, dhe nuk ka shumë të dhëna të përkthyera nga njerëzit për këto gjuhë. Për shembull, ka më shumë se 20 milionë njerëz që flasin dhe shkruajnë në Luganda, por shembuj të kësaj gjuhe të shkruar janë jashtëzakonisht të vështira për t'u gjetur në internet,” thotë Meta.

Kompania shpreson që përkthyesit njerëzorë do ta ndihmojnë atë të zhvillojë një standard të besueshëm që mund të vlerësojë automatikisht cilësinë e përkthimit për shumë gjuhë me burime të pakta dhe të margjinalizuara.

Modeli i AI me burim të hapur do të përkthejë gjithashtu 145 gjuhë të tjera në të gjithë botën, të cilat nuk mbështeten nga sistemet aktuale të përkthimit.

Kjo do të mundësojë më shumë se 25 miliardë përkthime çdo ditë në aplikacionet e Meta-s dhe do të ndihmojë makineritë me AI të Meta të shfaqin përmbajtjen më interesante në mediat sociale në gjuhët lokale dhe të rekomandojnë reklama më të përshtatshme.

Ky mund të jetë gjithashtu një përparim në fushat me të cilat platformat e mediave sociale si TikTok, YouTube, Facebook dhe WhatsApp kanë luftuar, si zbutja e gjuhës së urrejtjes politike, ngacmimi, dezinformimi, trafikimi i qenieve njerëzore, shfrytëzimi seksual dhe lajmet e rreme në Afrikë, pasi videot, teksti dhe audio publikohen në gjuhët popullore.

Mungesa e mjeteve të përkthimit me cilësi të lartë për qindra gjuhë në Afrikë do të thotë që miliona njerëz sot nuk mund të kenë akses në përmbajtjen dixhitale ose të marrin pjesë plotësisht në bisedat në internet ose në tregjet dixhitale në gjuhët e tyre amtare.

“Afrika është një kontinent me diversitet shumë të lartë gjuhësor dhe barrierat gjuhësore ekzistojnë çdo ditë. Në të ardhmen, imagjinoni të vizitoni grupin tuaj të preferuar në Facebook, të hasni në një postim në gjuhën igbo ose luganda dhe të jeni në gjendje ta kuptoni atë në gjuhën tuaj vetëm me një klik të një butoni,” thotë Balkissa Ide Siddo, drejtoreshë e politikave publike për Afrikën në Meta.

Në maj të këtij viti, Google shtoi 10 gjuhë të reja afrikane në Google Translate.