Venecia: Meta tejkaloi kompetencat me anulimin e zgjedhjeve, por fjalën e fundit e thotë Gjykata Kushtetuese (VIDEO)

Shtyrja e zgjedhjeve të 30 qershorit pa një bazë të qartë ligjore është tejkalim i Kushtetutës, por nuk përbën shkak për shkarkimin e presidentit. Kjo është ajo që theksohet në draft opinionin e Komisionit të Venecias, në përgjigje të kërkesës së dërguar pak javë më parë nga Kuvendi i Shqipërisë. Ekspertët e Komisionit të Venecias vlerësojnë se kreu i shtetit shqiptar ka tejkaluar kompetencat kushtetuese me anulimin e zgjedhjeve të 30 qershorit, duke sqaruar se një vendim i tillë duhet të merret vetëm në një situatë që plotëson kriteret për marrjen e masave të jashtëzakonshme.

Por në lidhje me shkarkimin e presidentit, “Venecia” sqaron se një vendim i tillë i takon Kuvendit dhe më pas Gjykatës Kushtetuese.

“Presidenti tejkaloi kompetencat e tij kushtetuese, duke anuluar fillimisht zgjedhjet lokale, e më pas duke i shtyrë ato. Do të jetë Kuvendi dhe në fund Gjykata Kushtetuese, që do të përcaktojnë nëse Presidenti ka bërë “shkelje të rënda”, të cilat do të çojnë në fajësimin e tij”, thuhet në draft opinionin e “Venecias”.

Në lidhje me këtë të fundit, Presidenca reagoi përmes zëdhënësit Tedi Blushi. Duke iu referuar deklaratës së Metës për skenarin e djegies së Kuvendit si arsyen e anulimit të zgjedhjeve të 30 qershorit, Blushi shprehet se kreu i shtetit ka mbrojtur Kushtetutën dhe ka shmangur gjakderdhjen.

Ai u bën thirrje palëve politike të ulen në tryezën e dialogut  dhe të zgjidhin krizën për të mos i shtuar më shumë kushte Shqipërisë.

Draft-opinioni i Venecias vjen dy javë pasi delegacioni i ekspertëve të Komisionit vizitoi Tiranën, ku u takua me krerët më të lartë të institucioneve të vendit. Në fund të korrikut, Kuvendi i Shqipërisë iu drejtua me një letër Komisionit të Venecias për t'i marrë opinion nëse Presidenti Ilir Meta e ka shkelur Kushtetutën me dekretin për anulimin e 30 zgjedhjeve vendore të 30 Qershorit.