Aktorja Betty White ndahet nga jeta dy javë para 100-vjetorit

Betty White, e cila mbante rekordin botëror të Guinness si artistja me karrierën më të gjatë televizive, ka vdekur në moshën 99-vjeçare.

“Edhe pse Betty ishte gati të mbushte 100 vjeç, mendoja se ajo do të jetonte përgjithmonë”, tha agjenti dhe miku i saj i ngushtë Jeff Witjas për People në një deklaratë pasi TMZ raportoi për herë të parë vdekjen e White të premten. "Do të më mungojë tmerrësisht ajo dhe po ashtu edhe bota e kafshëve që ajo e donte aq shumë. Besoj se Betty nuk kishte pasur ndonjëherë frikë nga vdekja sepse gjithmonë donte të ishte me burrin e saj të dashur Allen Ludden. Ajo besonte se do të ishte përsëri me të. "

White do të kishte mbushur 100 vjeç më 17 janar.

Aktorja e njohur bëri publikun për të qeshur për mbi 60 vjet në televizion dhe film. Ajo ishte më e njohur për rolet në The Mary Tyler Moore Shoë dhe Golden Girls. Ajo ishte anëtarja e fundit e mbetur gjallë e kastit të kësaj komedie.

Megjithatë, ajo nuk ishte thjesht një fytyrë e bukur që bënte edhe humor. Ajo ishte gruaja e parë që prodhoi një sitcom (Jeta me Elizabeth) dhe është nderuar me çmime nga Screen Actors Guild, Shoqata e Kritikëve të Televizionit dhe Akademia Britanike e Arteve të Filmit dhe Televizionit. Ajo u nominua 23 herë për një Emmy, duke fituar gjashtë trofe.

Dhe megjithëse shumë aktore gjejnë punë më vështirë me kalimin e moshës, karriera e White nuk u ndal kurrë. Në pesë vitet e fundit, ajo u bë personi më i vjetër që ka drejtuar ndonjëherë Saturday Night Live; ajo luajti në TV Land's Hot në Cleveland; drejtoi dhe prodhoi Betty White's Offir Rockers; dhe fitoi një çmim Grammy për një regjistrim zanor të librit të saj, If You Ask Me.

White lindi më 17 janar 1922 në Oak Park, Illinois, një fëmijë i vetëm me prejardhje angleze, uellsiane, daneze dhe greke. Gjatë Depresionit të Madh, familja e saj u transferua në Los Anxhelos, ku ndoqi shkollën Horace Mann në Beverly Hills. Atje, ajo zbuloi dashurinë e saj për të performuar.