Arrestohet lideri i opozitës në Ugandë

Lideri i partisë kryesore opozitare në Ugandë, Bobi Wine u arrestua këtë të enjte pas kthimit të tij në vend.

Lajmin e bëri me dije sekretari i përgjithshëm i partisë së tij.

“Bobi Wine u arrestua nga agjentët e regjimit sapo u ul në aeroport  në Entebbe”, shkroi në X David Lewis Rubongoya, sekretari i përgjithshëm i Platformës së Unitetit Kombëtar. Shkrimin e shoqëroi me një foto që tregonte një burrë të rrethuar nga dy persona.

Ish-këngëtari Bobi Wine, emri i vërtetë i të cilit është Robert Kyagulanyi, ishte rivali kryesor i Presidentit Yoweri Museveni.

Bobi Wine është arrestuar disa herë në vitet e fundit dhe tubimet e mbështetësve të tij janë shpërndarë rregullisht, ndonjëherë edhe me dhunë.