Presidenti turk Rexhep Tajip Erdogan ka kritikuar SHBA-në për dërgimin e një grupi anijesh luftarake në Mesdheun lindor në shenjë solidariteti me Izraelin, i cili të dielën i shpalli zyrtarisht luftë Hamasit.
Gjatë një konference të përbashkët për shtyp me kancelarin austriak Karl Nehammer në Ankara të martën, Erdogan tha se lëvizja e një grupi sulmues transportues, i cili përfshin USS Gerald R. Ford, më afër Izraelit, do të kryente "masakra të rënda" në Gaza.
“Çfarë do të bëjë aeroplanmbajtësja e SHBA pranë Izraelit? Pse vijnë? Çfarë do të bëjnë? Ata do të godasin Gazën dhe përreth dhe do të ndërmarrin hapa për masakra të rënda atje”, tha Erdogan.
Gjatë të njëjtës konferencë për shtyp, udhëheqësi turk kritikoi praninë e ushtrisë amerikane në Siri dhe përsëriti kritikat e tij ndaj SHBA-së për rrëzimin e një droni turk në zonë javën e kaluar, një incident që Pentagoni e ka përshkruar si "për të ardhur keq".
“Shikoni, sot ka mbi njëzet baza amerikane në Siri. Çfarë po bëjnë bazat e Amerikës në Siri?”, tha Erdogan. “Për fat të keq, Amerika rrëzoi një dron të Turqisë… A nuk është Turqia aktualisht partneri i Amerikës në NATO?”, tha ai, ndërsa akuzoi Uashingtonin për mbështetjen e organizatave terroriste.
“Për fat të keq, Amerika aktualisht po trajnon dhe armatos të gjitha grupet terroriste dhe për fat të keq, po i kthen këto vende në gjakderdhje, qoftë në Siri, në këtë rajon apo në Lindjen e Mesme”, tha Erdogan.
Gjithashtu të martën, Ankaraja rinovoi ofertën e saj për të ndërmjetësuar dhe qetësuar tensionet midis Izraelit dhe palestinezëve, me Erdoganin që zhvilloi telefonata me Sekretarin e Përgjithshëm të OKB-së Antonio Guterres dhe presidentin rus Vladimir Putin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
