Anëtarësimi i Shqipërisë, çfarë parashikon Karta e Bordit të Paqes

Në seancën e sotme, PS dhe PD bashkuan votat dhe miratuan me 110 vota pro marrëveshjen për aderimin e Shqipërisë në Bordin e Paqes. 

Opozita u përpoq të ndryshonte tekstin e marrëveshjes përmes 3 amendamenteve, njëri prej të cilëve kërkonte që emri i kryeministrit të fshihej dhe të përcaktohej se Shqipëria të përfaqësohej nga Presidenti ose nga kryeministri vetëm me autorizimin e kreut të shtetit. 

Amendamentet e opozitës u rrëzuan nga shumica. Tashmë pritet dekretimi i marrëveshjes nga Presidenti Bajram Begaj dhe hyrja në fuqi e saj pas botimit në Fletoren Zyrtare.

Çfarë parashikon Karta e Bordit të Paqes 

Anëtarësimi në Bordin e Paqes do të kushtojë 1 miliard dollarë. Sipas Kartës së Bordit të Paqes, bëhet anëtar çdo shtet i ftuar nga kryetari. 

Secili shtet mund të përfaqësohet në Bordin e Paqes nga presidenti ose qeveria. 

Mandati i anëtarësimit është tre vjet nga hyrja në fuqi e Kartës dhe rinovohet nga kryetari. Mandati nuk kufizohet në tre vite për të gjitha ato vende që kontribuojnë me 1 miliardë dollarë brenda vitit të parë të hyrjes në fuqi të Kartës. 

Një shtet anëtar mund të mos jetë më anëtar në përfundim të mandatit 3-vjeçar, nëse ky nuk rinovohet nga kryetari; nëse tërhiqet vullnetarisht, nëse përjashtohet me vendim të një shumice prej 2/3. 

Presidenti amerikan, Donald J. Trump, do të shërbejë si Kryetari inaugurues i Bordit të Paqes dhe, veçmas, edhe si përfaqësuesi inaugurues i Shteteve të Bashkuara të Amerikës. Kryetari do të ketë autoritet ekskluziv për të krijuar, ndryshuar ose shpërbërë njësi vartëse, sipas nevojës ose sipas vlerësimit të përshtatshëm, për përmbushjen e misionit të Bordit të Paqes.