Me sa duket, paratë nuk mund ta blejnë dashurinë. Por në rastin e sundimtarit të Dubait, Sheikh Mohammed bin Rashid al-Maktoum dhe gruas së tij të gjashtë, Princeshës Haya, mund të blejnë shumë gjëra të tjera, përfshirë edhe heshtjen e të dashurit të saj sekret.
Në atë që cilësohet si divorci më i kushtueshëm në historinë e Britanisë së Madhe, Sheiku i sapo divorcuar u urdhërua nga gjykata t'i paguante rreth 734 milionë dollarë gruas së tij.
Princesha Haya, 47 vjeçe, e cila është motra e Mbretit Abdullah II të Jordanisë, "huazoi" 7.5 milionë dollarë nga fondi i vajzës së saj 10-vjeçare për t’ia dhënë truprojës së saj, një ish-ushtar britanik, me të cilin ajo kishte një lidhje jashtë kurorës. Ekipi shoqërues i princeshës e kishte shantazhuar atë, duke i kërkuar para në këmbim të heshtjes. “Isha e frikësuar dhe këto ishin paratë e disponueshme në atë llogari”, tha princesha para gjykatës.
Sheiku, 72 vjeç, u divorcua nga gruaja e tij më e re kur zbuloi lidhjen, e cila çoi në procedurat e divorcit. Duke parë standardin e jetesës, gjyqtari vendosi që sundimtari i pasur duhej t'i paguante princeshës miliona për të ruajtur stilin e jetesës me të cilin ajo dhe fëmijët e saj ishin mësuar.
Është ironik fakti se në këtë sasi parash përfshihen edhe pagat e ekipit që ruan princeshën dhe fëmijët e saj - për t'i mbrojtur ata nga Sheiku, i cili e konsideron pabesinë e saj një shkelje të rëndë.
Gjykata vendosi se kërcënimi më i madh që i vjen gruas është ai që paraqet vetë ish-bashkëshorti. "Kjo komplikohet nga pushteti që ka ai, siç shihet nga aftësia e tij për të përdorur softuerin Pegasus, i cili është i disponueshëm vetëm për qeveritë."
Në gjykatë janë paraqitur prova se sheiku e përdori softuerin për të hakuar telefonat e princeshës dhe avokatëve të saj.
Shantazhuesit nuk janë vënë nën akuzë, megjithatë gjyqtari i çështjes e cilëson rastin e tyre anën më të shëmtuar të historisë.
Çifti u nda në vitin 2019 kur Sheiku zbuloi tradhtinë e së shoqes. Haya i çoi fëmijët, tani 14 dhe 9 vjeç, në Britani. Ndërsa ishin të martuar, sundimtari i dha princeshës një buxhet vjetor prej 110 milionë dollarësh për shpenzimet e shtëpisë dhe gati 12 milionë dollarë ndihmë për secilin prej fëmijëve. Haya fillimisht kërkoi gati 2 miliardë dollarë.
Gjykata shqyrtoi rastin duke u përqendruar te jeta superluksoze: fotografitë e pushimeve të familjes në super jahtin e tyre prej 400 milionë dollarësh, përveç fotografive të pushimeve nga koleksioni i vilave dhe pronave të tyre, si dhe fotot e Boeing 747 të tyre të bërë me porosi dhe helikopterët përkatës, të gjithë me rreth 80 shërbëtorë. Në sallë u raportua se në një rast, familja katër anëtarëshe shpenzoi më shumë se 2 milionë dollarë për luleshtrydhe.
Ndërsa pagesa e lartë me siguri do të kishte kënaqur shumicën e të divorcuarve - veçanërisht duke marrë parasysh rrethanat e tradhtisë së saj - Haya u shfaq e zhgënjyer se nuk iu kthyen veshjet e shtrenjta me vlerë rreth 110 milionë dollarë ose koleksioni i saj i bizhuterive prej 26 milionë dollarësh.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
