Një ngjarje që ka karakteristikat e një sulmi terrorist ka ndodhur në Nicë të Francës paraditen e sotme. Tre persona janë vrarë në afërsi të kishës së Notre-Dame, ndërsa dyshohet se ka edhe disa të plagosur të tjerë. Autori i sulmit është arrestuar, siç raportojnë burime policore të cituara nga agjencia France Presse. "Gjithçka të bën të mendosh për një sulm terrorist në bazilikën Notre-Dame”, tha kryetari i Bashkisë, Christian Estrosi.
Autoritetet e rendit u kanë kërkuar qytetarëve të mos dalin nga shtëpia.
Kjo nuk është hera e parë që zona e Nicës në Francë goditet nga një sulm terrorist. Më shumë se 80 veta vdiqën dhe rreth 500 u plagosën në Ditën e Bastijës, në vitin 2016, kur një terrorist islamik hyri me kamion në mes të një turme, e cila ishte mbledhur të shikonte spektaklin e fishekzjarreve.
Ngjarja e sotme vjen pas tensionit që krijuan te bota mysliman deklaratat e presidentit Macron pak ditë më parë. Ai nuk dënoi ribotimin e karikaturave të profetit Muhamed nga revista satirike “Charlie Hebdo”, ndërsa tha se “islami është një fe që po kalon një krizë në mbarë botën”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
