Për analistin dhe gazetarin Mustafa Nano, shkarkimi i presidentit do të ishte një precedent i rrezikshëm. Në studion e lajmeve të TvT, ku komentoi përfundimet e raportit të komisionit hetimor, Nano tha se shkarkimi i kreut të shtetit nuk ka qenë qëllimi i maxhorancës që në krye të herës. Ai theksoi se opinioni i Komisionit të Venecias i erdhi për shtat komisionit në fjalë.
“Nuk ka qenë në plan ta çonte deri në fund këtë akt. Do të krijonte një precedent të rrezikshëm, shkarkimi i presidentit nga një Parlament paksa i çuditshëm. Maxhoranca u kap te dega e Komisionit të Venecias. Nëse do të shkarkohej, do të ishte një gjest i rrezikshëm”, tha Nano.
Sipas tij, Meta vijon të jetë një faktor i fortë politik, pasi qëndron në krye të një institucioni që nuk kontrollohet nga maxhoranca. Megjithatë, në planin institucional, ky është një minus.
“Presidentin Meta e bën të fortë fakti që është kreu i të vetmit institucion shtetëror që nuk kontrollohet nga maxhoranca. Metën kjo e favorizon. Kjo e faktorizon në lojën politike, por e bën të dobët në planin institucional, pasi e bën palë”, tha Nano.
Sa u takon ndryshimeve kushtetuese që pritet të votohen kësaj jave nga Parlamenti, Nano tha se ato nuk cenojnë marrëveshjen e 5 qershorit.
“Fakti që kryeministri Rama u tregua i vendosur, mund të krijojë idenë se ka marrë mbështetjen e ambasadorëve. Ata duhet të jenë të kënaqur për 5 qershorin, por besoj se ata e shohin që ndryshimet kushtetuese nuk e cenojnë marrëveshjen. Amendamentet kushtetuese nuk e lëndojnë procesin elektoral, mund të krijojnë disa avantazhe për maxhorancën, që mund të neutralizohen nëse opozita është bashkë”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
