Progres-raporti i KE, Xhaçka: Shqipëria është gati për të filluar procesin e bisedimeve

Ministrja për Europën dhe Punët e Jashtme, Olta Xhaçka ka reaguar pas publikimit të progres-raportit të Komisionit Europian i cili ka sugjeruar hapjen e negociatave për Shqipërinë. Në një deklaratë për mediat, Xhaçka tha se raporti jep vlerësime pozitive për reformat dhe se rezultatet tashmë janë të prekshme. Ajo gjithashtu tha se raporti e shpreh qartë që Shqipëria është gati për fillimin e procesit të bisedimeve.

“Të gjitha arritjet janë provë e qartë e punës dhe vullnetit të qeverisë për të luftuar korrupsionin dhe krimin e organizuar. Në raportin e ODHIR vlerësohet se reforma elektorale u krye në përputhje me rekomandimet e ODHIR. Sigurisht ka vend për përmirësim të mëtejshëm. E rëndësishme është se akuzat po hetohen në mënyrë që të mos mbetemi në rrafshin e akuzave. Jemi të vetëdijshëm që ka ende punë por besoj se ky raport është konfirmim për punën e thellë për administratën. Raporti ka gjetje edhe për ekonominë dhe mënyrën si është përballur nga qeveria tërmeti dhe pandemia. Ai konfirmon që ekonomia ka rifilluar ringritjen që në gjysmën e dytë të vitit 2020. Kjo lidhet me punën e këtij dikasteri.

Mbrojtja e pakicave kombëtare. Edhe pse Shqipëria është vend model sa i takon mbrojtjes për minoritet duhet të zbatojnë aktet nënligjore për zbatimin e reformës kuadër për çështjen e minoriteteve. Siç e thashë këto pika, apo ndonjë pikë tjetër që vlerësohet që progresi nuk ka qenë i kënaqshëm apo që janë ngritur pikëpyetje, do të hetohet. Shqipëria është gati për të filluar procesin e bisedimeve. Ndërkohë që jemi gati për të hedhur hapin e radhës në procesin e integrimit, ndajmë të njëjtin qëndrim që konferenca duhet të zhvillohet sa më shpejt të jetë e mundur. Çdo vonesë ka ndikim negativ në besueshmërinë e vetë unionit. Angazhimi ynë do të fillojë për të jetësuar premtimin e rikonfirmuar për perspektivën europiane të rajonit tonë. Shqipëria duhet të ulet në tryezën e bisedimeve me BE, brenda këtij viti”, deklaroi Xhaçka.