Kompania e automjeteve Honda do të zhvendosë prodhimin e modelit të saj Civic me fuqi hibride nga Japonia në fabrikën e saj në Indiana në Shtetet e Bashkuara të Amerikës, në përpjekje për të zbutur ndikimin e politikave tarifore të Presidentit Donald Trump.
Prodhuesi i automjeteve tha se e konsideronte të përshtatshme për të zhvendosur prodhimin e modelit, të montuar aktualisht në fabrikën e tij në prefekturën Saitama, në veri të Tokios, në Shtetet e Bashkuara, duke pasur parasysh kërkesën dhe popullaritetin e lartë të Civic në atë vend.
Një zëdhënës i kompanisë i tha Bloomberg se prodhimi i modelit hibrid me pesë dyer, i cili filloi në shkurt në prefekturën Saitama në Japoninë qendrore, do të zhvendoset në fabrikën e Honda-s në Indiana rreth muajit qershor ose korrik.
Zëdhënësi tha se vendimi bazohej në faktorë të jashtëm, përfshirë vendosjen e tarifave të administratës Trump për makinat e prodhuara jashtë vendit dhe të importuara në SHBA.
Tarifat për pjesët e automjeteve pritet të hyjnë në fuqi jo më vonë se 3 maji.
Në vitin 2024, kompania prodhoi 3.73 milionë automjete globalisht, nga të cilat 693.259 ishin prodhuar në Japoni dhe mbi një milion njësi në SHBA.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
