Procesi i përzgjedhjes së drejtuesit të asaj që është cilësuar si FBI-ja shqiptare përmbyllet sot. SPAK pritet të shpallë në orën 14:00 emrin e kandidatit fitues për kreun e Byrosë Kombëtare të Hetimit. Aida Hajnaj duket se është kandidatja favorite, për shkak të skualifikimit të tre kandidatëve të tjerë: Artur Beu, Ervin Hodaj dhe Idajet Faskaj janë skualifikuar.
Pas shpalljes së kandidaturës së përzgjedhur, emri do t’i dërgohet KLP-së për të vulosur propozimin.
Procesi i përzgjedhjes së kandidatëve për anëtarë dhe drejtues të BKH-së, në kuadër të reformës në drejtësi, është monitoruar nga amerikanët dhe partnerët europianë.
Megjithatë, Partia Demokratike e ka kundërshtuar emrin e Hajnajt. Në një deklaratë pak ditë më parë, ish-deputeti Edi Paloka tha se qeveria po tenton të vendosë nën kontroll Byronë Kombëtare të Hetimit, si institucioni i fundit ende i pamarrë peng nga sistemi i drejtësisë.
“Për postin e drejtuesit të BKH-së nuk ka garë. Qeveria e ka bërë edhe këtë si tenderat: fituesi është i paracaktuar, në mënyrë që qeveria ta përdorë sa herë të dojë dhe si të dojë për të mbrojtur ortakët e krimit të organizuar, siç ka bërë edhe në të shkuarën”, tha Paloka.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
