Piloti rus u flet pasagjerëve pas uljes: Lufta është krim, ta ndalim

Të dashur pasagjerë, është kapiteni juaj që po flet. Po flas në emrin tim dhe jo si përfaqësues i linjës ajrore, mendoj se lufta në Ukrainë është një krim.

Këto janë fjalët e thëna nga një pilot rus i linjës ajrore Pobeda - që në rusisht do të thotë “fitore”, një degë e linjës ajrore Aeroflot, i cili iu drejtua pasagjerëve pas uljes në një fluturim komercial në Antalia, Turqi.

Identiteti i pilotit nuk bëhet me dije për momentin, por video e fjalimit pasionant të pilotit që dënonte luftën u bë menjëherë virale në rrjet dhe u përhap në Twitter dhe Youtube, ku e shpërndanë edhe zyrtarë të qeverisë ukrainase.

Fjalimi pasionant i pilotit kundër luftës

Sapo u ul, kapiteni u largua nga kabina dhe u fut në kabinën e pasagjerëve, ku mori altoparlantin dhe u dha të gjithëve një mesazh të qartë se dënonte sulmin rus në Ukrainë:

Zonja dhe zotërinj, ai që po ju flet është kapiteni. Mirësevini në Antalia, faleminderit që fluturuat me Pobeda. Unë po flas në emrin tim dhe jo si përfaqësues i linjës ajrore, mendoj se lufta në Ukrainë është një krim. Ne nuk duhet ta vazhdojmë këtë luftë, njerëzit e arsyeshëm duhet ta ndalojnë atë menjëherë. Mos e përkrahni këtë gjakderdhje. Faleminderit për vëmendjen.