Matura Shtetërore/ Sot provimi në lëndën e matematikës për mbi 27 mijë nxënës

Mbi 27 mijë maturantë do të zhvillojnë sot provimin e matematikës.
Provimi do të nisë në orën 10:00 dhe do të zgjasë 2 orë e 30 minuta.
Për organizimin e provimit janë parashikuar rreth 145 qendra, të cilat administrohen nga përgjegjës të caktuar dhe administratorë për çdo mjedis ku zhvillohet testi.
Për korrigjimin e testeve janë angazhuar më shumë se 640 mësues.
Provimet e maturës po zhvillohen në shkolla që plotësojnë kushtet infrastrukturore të përcaktuara nga Rregullorja e Maturës Shtetërore.
Deri tani, maturantët kanë kryer provimin e gjuhës së huaj dhe të gjuhës shqipe e letërsisë. Ndërsa më 24 qershor, ata do të nënshtrohen provimit me zgjedhje.
Provimi me zgjedhje ofron një gamë të gjerë lëndësh, përfshirë: Shkencat e Natyrës: Kimi, Fizikë, Biologji, Shkencat Shoqërore: Histori, Gjeografi, Qytetari dhe Psikologji, Filozofi dhe Sociologji dhe Ekonomia dhe Artet: Ekonomi, Histori Arti, Histori Muzike, Histori Baleti.