Komentet e kryetarit të Gjykatës Kushtetuese të Maqedonisë së Veriut se ekziston mundësia e shfuqizimit të "Ligjit për Gjuhët", kanë nxitur reagime të ashpra tek të gjitha partitë politike shqiptare.
Këto të fundit vlerësojnë se çdo ndërhyrje ndaj ligjit mund të cënojë përdorimin zyrtar të gjuhës shqipe dhe kjo do të shoqërohej me pasoja serioze për vendin.
Komentet kanë hasur në reagimin e ashpër edhe të Frontit Evropian, të drejtuar nga Bashkimi Demokratik për Integrim që vlerëson se bëhet fjalë për një skenar të qëllimshëm të pushtetit për provokim ndaj shqiptarëve.
Gjykata Kushtetuese në Maqedoninë e Veriut do të vendosë brenda pak ditësh nëse do ta lërë në fuqi apo do ta shfuqizojë Ligjin për Gjuhën. Nëse do të ndodhë kjo e dyta, gjuha shqipe nuk do të jetë gjuhë e dytë zyrtare në Shkup.
Lidhur me këtë çështje ka folur nga Elbasani gjuhëtari dhe Dekani i Fakultetit të Shkencave Humane në Universitetin Nënë Tereza në Shkup Mustafa Ibrahimi.
Z. Ibrahimi pohoi se beson se Gjykata Kushtetuese do t’u përgjigjet negativisht iniciativave për ta dëmtuar gjuhën shqipe dhe do t’i japin asaj statusin që i takon si gjuhë zyrtare.
Ligji për përdorimin e gjuhëve buron nga Marrëveshja e Ohrit që i dha fund konfliktit të armatosur midis kryengritësve shqiptarë dhe forcave ushtarake e policore maqedonase në vitin 2001
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
