Punëtorët britanikë të hekurudhave e nisin vitin e ri me grevë njëjavore

Punëtorët britanikë të hekurudhave e nisën vitin e ri me një grevë njëjavore. Greva nisi të martën, duke ndërprerë kthimin në punë.

Britania e Madhe po përballet me trazirat më të këqija të punëtorëve që kur Margaret Thatcher ishte në pushtet në vitet 1980, pasi inflacioni në rritje vjen prej mos rritjes së pagave, duke bërë që shumë punëtorë të jenë të paaftë për të përballuar jetesën.

Grevat e përsëritura hekurudhore kanë gjymtuar rrjetin muajt e fundit, ndërsa infermierët, stafi i aeroportit, mjekët e ndihmës mjekësore dhe punonjësit e postës i janë bashkuar gjithashtu protestave, duke kërkuar paga më të larta për të mbajtur ritmin me inflacionin që po lëviz rreth niveleve maksimale të 40 viteve, duke arritur në 10.7% në muajin nëntor.

Për shkak të veprimit industrial, do të ketë ulje të ndjeshme të shërbimeve të trenave përgjatë hekurudhës deri të dielën e 8 janarit.

Trenat do të jenë më të ngarkuar, mund të fillojnë më vonë dhe të përfundojnë më herët dhe në disa vende nuk do të ketë fare shërbime.

Kështu njoftoi kompania Network Rail

Qeveria ka thënë se nuk mund të përballojë t’u japë punonjësve të sektorit publik një rritje që përputhet me inflacionin, çka do të thotë se nuk ka fund në horizont për atë që është quajtur një “dimër i ri i pakënaqësisë”, lidhur me betejat industriale që mbërthyen Britaninë në fund të viteve 1970.

Qeveria u ka bërë thirrje krerëve të sindikatave të kthehen në tryezën e bisedimeve, të vetëdijshëm se grevat po dëmtojnë rëndë bizneset që mbështeten te udhëtarët, si kafenetë dhe baret në qendrat e qyteteve.