Një 31-vjeçare shqiptare, Etleva Bodi, nënë e katër fëmijëve, ndërroi jetë pas dy ditësh agonie në Savona të Italisë, pasi u mbyt të premten nga bashkëshorti i saj, Selami Bodi, punëtor ndërtimi 41-vjeçar në dhomën e tyre të gjumit, ne lagjen qendrore te Villapianes.
E shtruar në spitalin e San Paolos në gjendje kome, mbrëmjen e së dielës mjekët e deklaruan gruan të vdekur.
Gjendja e saj u shfaq e rënduar, kur ndihma e shpejtë hyri në shtëpinë ku ndodhi ngjarja me policinë dhe e gjetën 31-vjeçaren pa puls.
Sipas asaj që është mësuar deri më tani nga policia, Etleva dhe bashkëshorti i saj kanë pasur një debat të dhunshëm gjatë natës së të premtes, me sa duket për arsye xhelozie.
Gruaja ishte mbyllur në dhomën e gjumit dhe kishte marrë në telefonatë, nuk dihet se nga kush.
I shoqi e kishte dëgjuar duke folur, hapi derën dhe i vuri duart në qafë duke e mbytur.
Më pas, kur kuptoi se 31-vjeçarja nuk merrte më frymë, njoftoi ndihmën e shpejtë. Në momentin e ngjarjes, siç raportojnë mediat italiane katër fëmijët e çiftit, të moshës nga 5 deri në 11 vjeç, po flinin në dhomat e tyre. E transferuar në spital me kodin e kuq, zemra e saj pushoi së rrahuri pas 48 orësh.
Bashkëshorti i viktimës, pa precedentë penalë, u transferua në burgun Marassi (Xhenova), i akuzuar për vrasje.
Katër fëmijët e çiftit, megjithatë, aktualisht i janë besuar dajës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
