Maqedonia do të mbajë një referendum më 30 shtator për Marrëveshjen me Greqinë për çështjen e emrit. Kuvendi ka votuar me 68 vota pro dhe asnjë kundër për modalitetet e referendumit i cili do të jetë konsultues dhe me pyetjen: “A jeni për anëtarësimin e Maqedonisë në NATO dhe BE me pranimin e marrëveshjes me Greqinë”.
Opozita nuk ka marrë pjesë në votim, pasi paraprakisht kishte bërë të ditur se nuk mbështet referendumin.
Kryeministri Zoran Zaev paraprakisht i kishte bërë thirrje VMRO-DPMNE-së të mbështes referendumin si një proces shumë i rëndësishëm për të ardhmen e vendit, pasi me të, sipas tij, zhbllokohet procesi integrues i cili është bllokuar tani një dekadë pikërisht për shkak të kontestit së pazgjidhur të emrit.
Por, nga opozita kundërshtuan pyetjen e referendumit, për shkak të, siç thonë manipulimeve që tenton të bëjë pushteti me fshehjen e ndërrimit të emrit të shtetit.
Që referendumi të ketë sukses duhet të votojnë mbi 50 për qind e trupit votues që numëron rreth 1 milion e 800 mijë votues dhe nga ta, gjysma të deklarohet pozitivisht.
Pas referendumit, nëse kalon me sukses, pasojnë ndryshimet kushtetuese me qëllim harmonizimin e dispozitave të saj me Marrëveshjen me Greqinë që parasheh emrin“Maqedonia e Veriut”.
Me zbatimin e Marrëveshjes për emrin, si nga Maqedonia ashtu edhe nga Greqia, përfundimisht zhbllokohet procesin integrues, fillimisht me anëtarësimin e vendit në NATO dhe me hapjen e procesit të bisedimeve për anëtarësim në Bashkimin Evropian.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
