Berisha: S’ka ndryshuar qasja e Amerikës ndaj Kurtit. Kosova e përfaqësuar në vijë të parë nga Osmani

Ish-zv.ministri i Jashtëm i Kosovës Anton Berisha tha në edicionin e lajmeve në MCN TV se nuk ka ndonjë ndryshim të qasjes së SHBA-ve ndaj Albin Kurtit, duke shtuar se Kosova është përfaqësuar në vijë të parë nga Presidentja Osmani. Po ashtu Berisha theksoi se Uashingtoni i ka kërkuar Kurtit të mos ndërmarrë veprime të njëanshme dhe befasuese, por të bashkërendojë veprimet me SHBA-të dhe BE-në.

“Nuk ka ndonjë ndryshim për Kurtin në SHBA. Kosova në vijë të parë është e përfaqësuar prej Presidentes. Nuk presim ndryshim në qasje, politika amerikane është e qartë në objektiva dhe në mënyrën e veprimit, sepse çështja e Kosovës s’është vetëm e Kosovës, por është çështje për SHBA-të dhe çështje gjeopolitike dhe gjeostrategjike. SHBA-të nuk ndryshojnë qasje, janë shtetet e vogla që ndryshojnë qasje. Z.Kurti i është kërkuar që të mos ndërmarrë veprime të njëanshme dhe befasuese por të bashkërendojë veprimet me SHBA-të dhe BE-në dhe të jetë palë konstruktive në dialogun me Serbinë. Ne jemi sforcuar, sidomos qeveria e fundit e ka bërë diskurs kryesor Serbinë. Ne duhet të koncentrohemi sa më pak te Serbia, sepse s’ka asnjë gjasë që në një të ardhme të afërt të ndryshojë.

Çështja e sigurisë s’është në dorën e Osmanit dhe Kurtit, por në dorën e SHBA-ve dhe NATO-s që janë prezente aty. Nëse Serbia sulmon apo nuk sulmon varet prej qëndrimit amerikan dhe jo qëndrimit të Kurtit. E dyta temat jo të kota, por të dëmshme, janë çdo veprim jo demokratik në Veri të Kosovës dhe çdo veprim policor i pakoordinuar me partnerët. Çdo veprim i qeverisë për efekte elektorale është temë e kot sa i përket interesit shtetëror të Kosovës”.

Ai shtoi se që prej vitit 1999 kur kanë ndodhur bombardimi i NATO-s dhe deri më tani politika amerikane dhe gjithë presidentët e saj kanë qenë konseguentë dhe në vazhdimësi në favor të shtetit të Kosovës.