Emisioni "Xhadat" këtë herë është ndalur te siguria e ujit të ambalazhuar që tregtohet në vendin tonë. Të gjitha shishet e ujit kanë diçka të përbashkët, mungesën e datës së prodhimit. Pra, shishet e ujit me ambalazh plastik nuk kanë datën kur ky ujë është hedhur brenda enës plastike, por kanë vetëm datën e skadencës së tij ose deri kur ky ujë duhet përdorur. Pjesa më e madhe e shisheve me ujë që “Xhadat„ blenë skadojnë pas dy vjetësh, në vitin 2025, teksa nuk dihet se kur ky ujë është hedhur në shishe plastike.
I pyetur në lidhje me mungesën e datës së prodhimit (ambalazhimit) në etiketën e produktit, Autoriteti Kombëtar i Ushqimit thotë se bazuar në ligjin për ushqimin “Në deklarimin e jetëgjatësisë minimale data paraprihet nga fjalët, të përdoret përpara ose të përdoret deri më ... „ Kjo nënkupton faktin se si tek uji, ashtu edhe tek ushqimet, nga ana e subjekteve, është e detyrueshme të vendoset vetëm data e skadencës.
Nga ana tjetër, drejtori i Zyrës për Mbrojtjen e Konsumatorit, Hasan Stafa, shprehet se vendosja e datës së prodhimit përcaktohet në ligjin për konsumatorin. Në rastin që kjo datë nuk është shënuar, sipas tij produkti është i dyshimtë dhe duhet analizuar. Sipas Stafës, nga prodhimi deri të shitja, duhet zbatuar një zinxhir i gjatë, dhe mosrespektimi i disa prej këtyre hallkave mund ta kthejë ujin e ambalazhuar në një produkt të rrezikshëm. Këtu është fjala për kushtet e transportit, ruajtjes dhe ambalazhimit.
“Xhadat„ iu drejtuan përsëri AKU-së, për të marrë një përgjigje lidhur me mungesën e datës së prodhimit (ambalazhimit) të ujit, kësaj here duke cituar ligjin për konsumatorin. AKU-ja në përgjigjen e dhënë u shpreh se nuk bën interpretim ligjor se cili ligj prevalon mbi tjetrin dhe për këtë arsye sygjeroi t’i drejtoheshim Drejtorisë së Kodifikimit në Ministrinë e Drejtësisë.
Kërkesën e “Xhadave„, Drejtoria e Kodifikimit në Ministrinë e Drejtësisë ia kishte deleguar Drejtorisë së Atikorrupsionit, e cila këtë përgjigje e kërkonte sërish nga AKU.
Përveç mungesës së datës së prodhimit, një tjetër element që ngre dyshime mbi kontrollin e cilësisë së ujit nga ana e institucioneve, është dhe pjesa e analizave.
Analizat laboratorike të shisheve me ujë të blera nga gazetarët janë realizuar në vitet 2015-2018.
Nisur nga ky fakt “Xhadat„ iu drejtuan Institutit të Shëndetit Publik për ta pyetur në lidhje me analizat që kryen sa i takon cilësisë së ujit, por ISHP deklaroi se nuk ka asnjë kompetencë në lidhje me kryerjen e analizave të ujit, ndonëse në disa nga etiketat e ujit të ambalazhuar shkruhet se analizat janë kryer nga ky institucion.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
