Kryeministri Edi Rama sot në Vlorë prezantoi projektin e aeroportit të qytetit. Rama deklaroi se kantieri i punimeve për Aeroportin e Vlorës do të çelet në pranverën e vitit 2020. Sa i përket financimit, Rama thotë se po studiohen dy mundësi:
“Kemi në dorë projektin e aeroportit, i cili është i gatshëm për t'u marrë në dorë nga ndërtuesi dhe për të filluar ndërtimin. Po studiojmë paralelisht dy opsione, ose qysh në fazën e ndërtimit me një kompani serioze ndërkombëtare ose do ta ndërtojmë vetë, me buxhetin e infrastrukturës dhe pastaj do të përzgjedhim operatorin ndërkombëtar. Sepse s’kemi më kohë për të humbur dhe në pranverë duam të hapim kantierin”, shprehet Rama.
Në fjalën e tij Rama veçoi faktin se ky do të jetë një aeroport ndërkombëtar, i përmasave më të mëdha se ai i Rinasit në Tiranë. “Ky aeroport është shumë më rëndësi, pasi nuk është aeroport turistik. Ky duhet të jetë një aeroport më i madh se i Tiranës dhe më një standart më të lartë. Jo se Vlora është më e rëndësishme se Tirana se kjo nuk diskutohet pasi Vlora është më e rëndësishme se New Yorku, Berlini, etj. Prandaj edhe aeroportin do e ndërtojmë ndërkomtarë dhe të kompletuar', tha Rama.
Gjatë këtij prezentimi, kryeministri Edi Rama foli edhe për dështimin e negociatave me konsorciumin turk, që kërkoi fillimisht ndërtimin e veprës.
“U përpoqëm të arrinim një marrëveshje me konsorciumin, dhe pas një negociate shumë të gjatë arritëm në konkuluzioin se nuk kishim pika afrimiteti për të nënshkruar një marrëveshje. Kërkesat e kompanisë për garancitë që kërkonte nga shteti ishin përtej mundësive tona. E gjitha kjo ndodhte në një kontekst kur Vlora ende nuk e kishte marrë imazhin që ka sot”, tha Rama.
Në prill të këtij viti ministria e infrastrukturës konfirmoi zyrtarisht dështimin e negociatave me kompanitë turke, por deklaroi se projekti do të vazhdojë dhe Qeveria do të hapë tender ndërkombëtar për ndërtimin e aeroportit të Vlorës.
Ministrja e Infrastrukturës, Belinda Balluku dha disa detaje nga aeroporti i Vlorës, ku vuri theksin se është një projekt modern i parametrave ndërkombëtar, por nuk munguan edhe kritikat për aeroportit të Rinasit.
"Nuk është më një ëndërr,por realitet. Një aeroport loë-cost. Aeroporti i Tiranës, Biznesi i ka prekur xhepat e shqiptarëve, ka cenuar sigurinë. Kemi marrë masa. Ka pasur ndryshime të mëdha në linjën menaxheriale, presim që të na prezantohet plani i investimeve që kanë munguar. Presim që të ketë ndryshime të mëdha. Një piste e parametrave ndërkombëtare. "Air Albania" shumë shpejt do fluturojë drejt SHBA-së. 3.2km pista e aeroportit të Vlorës, me gjerësi 60 metra duke plotësuar kushtet e një aeroporti modern. Tre kolona kryesore" Aviacioni Civil, të gjitha funksionet. Cargo-s e tregëtisë së mallrave dhe shtylla e tretë është mirëmbajtjen e Avionëve", tha ministrja Balluku.
Kreu i qeverisë, Edi Rama ua ka lënë në dorë qytetarëve sa i takon emrit të Aeroportit të Vlorës, ndonëse tregoi se kishte në kokë një ide, por preferoi që të mos ta bënte publike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
