Lia e majmunit, shpallet gjendja e emergjencës në Afrikë  

<p>Qendrat e Afrikës për Kontrollin dhe Parandalimin e Sëmundjeve e kanë shpallur epideminë e lisë së majmunit, e cila po përhapet nga Republika Demokratike e Kongos në vendet e tjera afrikane, emergjencë të shëndetit publik për sigurinë kontinentale.</p> <p>Kjo “<strong><em>nuk është thjesht një sfidë tjetër, por një krizë e vërtetë që kërkon veprim politik kolektiv</em></strong>”, tha Drejtori i Përgjithshëm i CDC-së së Afrikës, Jean Kaseya.</p> <p>"<em>Si kontinent jemi përballur me pandeminë, epidemitë e ndryshme, fatkeqësitë natyrore dhe konfliktet. Jemi ngritur nga çdo fatkeqësi. Sot përballemi me linë e majmunit". "Por më lejoni të jem i qartë: ky nuk është vetëm një problem i Afrikës, ky është një kërcënim global</em>," përfundoi Kaseya.</p> <p>Që nga fillimi i vitit ka pasur rreth 15 mijë raste të këtij virusi në Afrikë dhe 461 vdekje. Shumica janë për shkak të një lloji të ri që është përhapur nga Republika Demokratike e Kongos.</p> <p>Nesër, Organizata Botërore e Shëndetësisë do të mblidhet për të vendosur nëse epidemia përfaqëson një emergjencë shëndetësore me shqetësim ndërkombëtar.</p> <p>Qarkullimi i virusit vazhdon. Në muajin qershor, sipas të dhënave të fundit të Organizatës Botërore të Shëndetësisë, janë konfirmuar 934 raste dhe 4 vdekje në mbarë botën. Numra larg atyre të regjistruar gjatë epidemisë 2022, por që janë shqetësuese për shkak të tendencave të reja që janë shfaqur muajt e fundit.</p> <p>Të gjithë sytë janë te Afrika, i vetmi rajon ku infeksionet po rriten. Këtu janë përqendruar 61% e rasteve të regjistruara në qershor (567). Megjithatë, siç specifikon OBSH, numri sigurisht që është nënvlerësuar. Republika Demokratike e Kongos, në veçanti, është epiqendra e kësaj epidemie të re: vetëm ajo përbën 96% të infeksioneve. Shqetësimi lidhet me shfaqjen e një lloji të ri të virusit (Clade Ib): ai është më virulent se ai që u përhap midis 2022 dhe 2023 në të gjithë botën (Clade IIb), por krahasuar me virusin motër endemik në Afrikën Qendrore - Clade Ia - transmetohet më lehtë, për shembull përmes kontaktit seksual.</p> <p>Lloji i ri po zgjerohet jashtë Republikës Demokratike të Kongos dhe në zbulimin e fundit Burundi, Kenia, Ruanda dhe Uganda raportojnë gjithashtu rastet e para.</p> <p>OBSH aktualisht e konsideron të lartë rrezikun e lidhur me linë e majmunit në Republikën Demokratike të Kongos dhe vendet fqinje. Rreziku është i moderuar në pjesën tjetër të Afrikës dhe botës.</p>