KLP miraton Aida Hajnaj në krye të Byrosë Kombëtare të Hetimit

KLP ka emëruar unanimisht Drejtuesen e Byrosë Kombëtare të Hetimit, Aida Hajnaj.

Në seancën ku ishin të pranishëm të gjithë anëtarët, emri i Hajnajt është miratuar për postin e drejtueses së asaj që njihet ndryshe si FBI-ja shqiptare.

Një javë më parë, SPAK-u shpalli emrin e Hajnajt si kandidate fituese për kreun e Byrosë Kombëtare të Hetimit, pas skualifikimit të tre kandidatëve të tjerë: Artur Beu, Ervin Hodaj dhe Idajet Faskaj.

Procesi i përzgjedhjes së kandidatëve për anëtarë dhe drejtues të BKH-së, në kuadër të reformës në drejtësi, është monitoruar nga amerikanët dhe partnerët europianë.

Megjithatë, Partia Demokratike e ka kundërshtuar emrin e Hajnajt. Në një deklaratë pak ditë më parë, ish-deputeti Edi Paloka tha se qeveria po tenton të vendosë nën kontroll Byronë Kombëtare të Hetimit, si institucioni i fundit ende i pamarrë peng nga sistemi i drejtësisë.

“Për postin e drejtuesit të BKH-së nuk ka garë. Qeveria e ka bërë edhe këtë si tenderat: fituesi është i paracaktuar, në mënyrë që qeveria ta përdorë sa herë të dojë dhe si të dojë për të mbrojtur ortakët e krimit të organizuar, siç ka bërë edhe në të shkuarën”, tha Paloka.