Argjinatura e çarë e lagunës së Vainit, në zonën e Tales, është arritur të izolohet, megjithatë rreziku për përmbytje vijon të mbetet i pranishëm, raporton për “MCN Live” korrespondenti nga Lezha, Juli Simoni.
Ai bën të ditur se, pavarësisht ndërhyrjes së autoriteteve për mbylljen e çarjes, situata kërkon ende vëmendje, ndërsa policia ka nisur hetimet për të përcaktuar shkaqet e prishjes së argjinaturës dhe përgjegjësitë e mundshme.
Argjinatura e çarë e lagunës së Vainit në zonën e Talës është arritur të izolohet, megjithatë rreziku vijon të mbetet prezent. Operacioni i ndërhyrjes ka përfunduar rreth orës 03:00 të mëngjesit, ku janë hedhur tonelata gurësh dhe inertesh për të mbyllur çarjen.
Mjetet e ushtrisë pritet të rikthehen sërish në terren gjatë ditës për të vijuar me përforcimin e argjinaturës, e cila ende ka rrjedhje uji. Fatmirësisht, çarja e argjinaturës për herë të dytë nuk ka shkaktuar dëme të mëdha në zonën e bregut të Matës.
Ndërkohë, që prej datës 23 nëntor, policia ka kryer veprime verifikuese dhe ka referuar materialet në Prokurori lidhur me çarjen e argjinaturës.
Dyshohet se incidenti mund të ketë ndodhur si pasojë e mos hapjes së kanalit natyror që siguron komunikimin e detit me lagunën e Vainit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
