Jeta e dyfishtë e shqiptarit Vital Dapi që vrau të moshuarit për t’u marrë milionat në Angli

Shqiptari Vital Dapi, që vrau çiftin e pensionistëve në Angli përdori një identitet të vjedhur për të pretenduar azil dhe jetoi në Britani për gati 2 dekada. Dapi jetonte një jetë të dyfishtë në Angli dhe Shqipëri për 17 vite përpara se të vriste Peter dhe Sylvia Stuart.

Ish-komando i Forcave Speciale në Shqipëri sulmoi çiftin e të moshuarve në fshatin Suffolk sepse mendoi se ishin milionerë dhe i duheshin para për të larë borxhet e tij të kumarit.

Detektivët thanë se dinin fare pak për të kur ai u arratis pasi vrau të moshuarit. 75-vjeçari Stuard u gjet me 9 plagë në trup ndërsa trupi i bashkëshortes së tij 69-vjeçare nuk u gjet kurrë. Dapi u arrestua në Luksemburg dhe pranoi identitetin e tij të vërtetë, por zyrtarët britanikë nuk e besuan dhe u gjykua për emrin e rremë, Ali Qazimaj. Por pasi gjykata vendosi ta dënojë Dapin u zbulua më vonë se ai kishte mbërritur në Angli në vitin 1999 me kamion si emigrant i paligjshëm. 

“Gjithmonë e ka patur ëndërr Perëndimin. Sa herë që shikonte në televizor mbretëreshën ose Tony Blair thoshte ‘dua të punoj për ju, dua t’ju shërbej’”, deklaroi motra e tij Esmeralda Hasko.

Në dhjetor të vitit 1998, Dapi pagoi një trafikues qeniesh njerëzore për të shkuar në Itali dhe më pas në Holandë. Më 25 shtator 1999 ai i hipi një anijeje për në Essex. “Ai qëndroi brenda karburatorit të kamionit përgjatë gjithë udhëtimit. Kur mbërriti në Britani s’e besonte askush se ishte gjallë”, tha xhaxhai i tij Murat Dapi. Në Britani ai kaloi 6 muaj në një kamp refugjatësh.

Pas disa eksperienca punësh si shofer dhe shitës dyqani në Londrën Veriore ai u zhvendos në Tilbury Essex ku filloi punë si kujdestar i të atit dhe njerkës së Steve Paxman, dhëndrit të çiftit që vrau.