Skafi godet për vdekje një fëmijë 7 vjeç, në pranga oficeri i policisë së Elbasanit

Një fëmijë ka humbur jetën pasi është goditur nga një skaf në plazhin e Potamit në Himarë.

Policia njofton zyrtarisht se sot, rreth orës 14:00, në plazhin e Potamit, shtetasi Arjan Tase, duke drejtuar një mjet lundrues tip skaf, dyshohet se ka humbur kontrollin mbi drejtimin e mjetit lundrues dhe për pasojë mjeti lundrues ka goditur një fëmijë rreth 7 vjeç, i cili për shkak të dëmtimeve ka ndërruar jetë në vendngjarje.

Drejtuesi i mjetit lundrues është arrestuar menjëherë pas ngjarjes.  

MCN mëson se Arjan Tase, është shefi i policimit në komunitet në Drejtorinë Vendore të Policisë Elbasan.

Viktima, një vajzë 7 vjeç 

Viktima mësohet se është fëmijë e një çifti me origjinë nga Tropoja dhe me banim në Britaninë e Madhe. Familja Avdia ishte kthyer për pushime në atdhe, por një ditë e zakonshme plazhi është kthyer në tragjedi për ta.  

Ky është rasti i tretë i incidenteve me mjete lundruese në plazhet e jugut, ku fillimisht në atë të Jalës një skaf përplasi një çift të fejuarish, ndërsa pak ditë më vonë një fëmijë u godit nga një mjet lundrues në plazhin e Jonufrës.

Përjashtohet nga policia autori i ngjarjes

Pas ngjarjes, drejtori i Përgjithshëm i Policisë së Shtetit, Gledis Nano, njoftoi përjashtimin nga radhët e Policisë së Shtetit të oficerit të Policisë, komisar Arjan Tase, me detyrë Shef Seksioni i Policimit në Komunitet në Komisariatin e Policisë Elbasan, i cili është arrestuar menjëherë pasi ka ndodhur ngjarja. Oficeri i Policisë ndodhej me pushime në Himarë dhe duke drejtuar një mjet lundrues skaf, dyshohet se ka humbur kontrollin mbi drejtimin e mjetit dhe për pasojë mjeti lundrues ka goditur vajzën 7-vjeçare të familjes Avdia, e cila për shkak të plagëve të marra ndërroi jetë në vendngjarje.

Po ashtu, është pezulluar nga detyra, deri në zbardhjen e plotë të rrethanave të ngjarjes, drejtori i Drejtorisë Vendore për Kufirin dhe Migracionin Vlorë, Kryekomisar Shpëtim Hasanaliaj.