Rusia përplaset me perëndimin për helmimin e ish-spiunit, SHBA dhe Evropa dëbojnë dhjetëra diplomatë rusë

Shtetet e Bashkuara dhe aleatët e saj evropianë po dëbojnë dhjetra diplomatë rusë në një përgjigje të bashkërenduar ndaj helmimit të një ish-spiuni rus në Britani të Madhe.

Presidenti i SHBA Donald Trump ka urdhëruar 60 diplomatë rusë të largohen nga vendi. Gjermania, Franca, Ukraina dhe vende të ndryshme të BE kanë bërë të njëjtën lëvizje.

Sipas BBC, Rusia ka treguar se do të përgjigjet "proporcionalisht". Rusia mohon ndonjë rol në sulmin ndaj Sergei Skripal dhe vajzës së tij në Salisbury, Anglia jugore. Çifti mbetet në një gjendje kritike por të qëndrueshme në spital.

Zëdhënësja e ministrisë së jashtme ruse Maria Zakharova e dënoi BE-në për "interpretimin e shfrenuar të solidaritetit" me Mbretërinë e Bashkuar.

Krerët e BE ranë dakord javën e kaluar se ishte shumë e mundshme që Rusia ishte pas helmimit nervor. Në SHBA, 48 nga diplomatët që do të dëbohen thuhet se janë në ambasadën ruse në Uashington ndërsa të tjerët janë në OKB në Nju Jork.

Ajo gjithashtu do të urdhërojë mbylljen e konsullatës ruse në Seattle. Departamenti i Shtetit tha në një deklaratë: "Më 4 mars, Rusia përdori një agjent nervor ushtarak për të vrarë një qytetar britanik dhe vajzën e tij në Salisbury.

"Ky sulm në Mbretërinë e Bashkuar vuri jetën e shumë personave të pafajshëm në rrezik dhe rezultoi në dëmtime serioze për tre vetë, duke përfshirë një oficer policie."

Ajo e quajti sulmin një "shkelje të egër të Konventës së Armëve Kimike dhe shkelje të së drejtës ndërkombëtare". Presidenti ukrainas Petro Poroshenko tha se vendimi i tij do të dëbojë 13 diplomatë dhe ky vendim është marrë "në frymën e solidaritetit me partnerët tanë britanikë dhe aleatët transatlantikë dhe në bashkërendim me vendet e BE".

Më parë të hënën, vende të ndryshme evropiane, përfshirë Letoninë, Lituaninë, Estoninë dhe Poloninë, kishin thirrur ambasadorë rusë në ministritë e tyre të jashtme.