Çmimi Nobel 2020 në Fizikë iu dha tre fizikanëve që kanë zbuluar misteret më të mëdha të hapësirës: vrimat e zeza. Fituesit janë Roger Penrose, akademik i Universitetit të Oksfordit që mori gjysmën e çmimit, ndërsa shkencëtarja amerikane Andrea Ghez dhe gjermani Reinhard Genzel ndanë gjysmën tjetër.
Penrose iu njoh puna për "zbulimin se formimi i vrimave të zeza është një parashikim i fortë i teorisë së përgjithshme të relativitetit".
Ghez dhe Genzel iu dha gjysma tjetër e çmimit për "zbulimin e një objekti kompakt supermasiv në qendër të galaktikës sonë".
Është bërë e zakonshme ndarja e çmimit mes disa shkencëtarëve që kanë punuar në fusha të ngjashme. Çmimi i vitit të kaluar shkoi për kozmologun e lindur në Kanada, James Peebles, për punën teorike në lidhje me universin menjëherë pas shpërthimit Big Bang, dhe astronomëve zviceranë Michel Mayor dhe Didier Queloz për zbulimin e një planeti jashtë sistemit tonë diellor.
Çmimi prestigjioz shoqërohet me një medalje të artë dhe një çmim prej 10 milionë koronash suedeze (më shumë se 950 000 €), një traditë që e nisi më shumë se një shekull më parë shpikësi suedez, Alfred Nobel.
Fituesit e çmimeve këtë vit nuk do të ftohen në Stokholm për ceremoninë e zakonshme të dhënies së çmimeve për shkak të pandemisë së koronavirusit.
Të hënën, Komiteti Nobel u dha çmimin për mjekësinë amerikanëve Harvey J. Alter dhe Charles M. Rice dhe shkencëtarit të lindur në Britani, Michael Houghton, për zbulimin e virusit Hepatiti C.
Çmimet e tjera në fushat e kimisë, letërsisë, paqes dhe ekonomisë pritet të ndahen në ditët në vijim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
