Në orët e para të mëngjesit të sotëm në Rinas kanë mbërritur 121 afganët e parë. Ata janë pritur në Aeroport nga ministrja e Punëve të Jashtme Olta Xhaçka dhe ambasadorja amerikane, Yuri Kim.
Transporti i tyre është kryer me avion civil nga Tbilisi, ndërsa me të mbërritur në Rinas ata i janë nënshtruar një kontrolli.
Kryeministri Edi Rama i ka uruar mirëseardhjen 121 afganëve nëpërmjet një postimi në Facebook, ku ka publikuar një video të mbërritjes së refugjatëve.
Ai shkruan se shqiptarët si vend e popull krenohen me traditën dhe se ligji i të parëve thotë se shtëpia e shqiptarit është e Zotit dhe e mikut.
Mirëmëngjes pa u gdhirë dhe me këtë episod live mikpritjeje shqiptare, që na kujton kush ishim dikur e na bën nder si vend e si popull, që krenohemi me traditën jo veç me fjalë, ju uroj një ditë të mbarë të gjithëve, duke i uruar së bashku me të gjithë ju mirëseadhjen, në tokën ku ligji i të parëve thotë se shtëpia e shqiptarit është e Zotit dhe e mikut, edhe 121 fëmijëve, grave e burrave nga Afganistani fatkeq, të cilët braktisën shtëpinë e tokën e tyre, për të shpëtuar jetën.
Nga ana e saj ambasadorja amerikane në Tiranë, Yuri Kim, e cila ka qenë e pranishme edhe gjatë orëve të para pas mesnatës në Aeroportin e Rinasit, ku mbërriti grupi i parë afganëve thekson se populli shqiptar edhe njëherë u ofron mikpritje dhe mbrojtje atyre në nevojë të madhe, e shton se SHBA-të janë krenare që kanë Shqipërinë mik dhe aleat.
Mirëpritëm grupin e parë të afganëve që kërkonin strehim të përkohshëm në Shqipëri. Siç kanë bërë gjithmonë, populli i Shqipërisë edhe një herë u ofron mikpritje dhe mbrojtje atyre në nevojë më të madhe. Ne jemi krenarë t’ju quajmë një mik dhe aleat. Faleminderit.
Ndërsa në fjalën e saj gjatë pritjes së afganëve, Xhaçka tha se për 20 vjet ata ishin aleatët tanë dhe se ishte detyrim që të mos i braktisnim në mëshirën e talebanëve. Frika për sulme terroriste, si ajo që ndodhi ditën e djeshme në aeroportin e Kabulit tha Xhaçka ishte shtysa për t'i evakuuar sa më shpejt ata nga Afganistani.
Xhaçka e cilësoi momentin e mbërritjes së afganëve 'shumë emocionues', ndërsa u shpreh se janë 121 jetë të shpëtuara nga tmerri i luftës.
Ajo vë edhe njëherë theksin tek tradita shqiptare e mikëpritjes, ndërsa shkruan se nuk ishte rastësi as strehimi i hebrenjve e shqiptarëve të Kosovës.
Ministrja bën me dije se grupi i parë i afganëve do të strehohet në një strukturë hoteliere në Durrës, duke shtuar se afganët e tjerë që do të vijnë në ditët në vijim do të strehohen për pak ditë në konviktet e QS.
Kujtojmë se Shqipëria do të mirëpresë rreth 4 mijë afganë. Sipas kryeministrit Edi Rama qëndrimi i tyre në vendin tonë do të jetë i përkohshëm, pasi ata do të zhvendosen përfundimisht në SHBA.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
