Dita e sotme është afati i fundit për dorëzimin e listave të kandidatëve të partive në Komisionin Qendror të Zgjedhjeve (KQZ) për zgjedhjet parlamentare që do të zhvillohen më 11 maj.
Protokolli i KQZ do të presë listat e kandidatëve nga 12 qarqet e vendit.
Lista e Partisë Socialiste do të zyrtarizohet sot në mbledhjen e Kryesisë që do të zhvillohet në orën 19:00. Kryeministri Edi Rama ka deklaruar në mbledhjet e tij me kabinetin e ministrave dhe Grupin Parlamentar të PS-së se deputetët, edhe ata që kanë vetëm një mandat, do të jenë pjesë e listave të hapura.
Për veten e tij, Rama ka shprehur se ende nuk ka marrë një vendim për t'u futur në listë dhe ka lënë mundësinë që të mos jetë fare pjesë e saj. Në listën e mbyllur, ai ka thënë se do të përfshihen njerëz që do të hyjnë për herë të parë në Parlament.
Ndërkohë, Partia Demokratike e Shqipërisë ka njoftuar se sot do të zhvillohet mbledhja e Kryesisë së PD-së në orën 17:00, dhe më pas mbledhja e Këshillit Kombëtar, që do të nisë në orën 19:00.
Në këto mbledhje, pritet të shqyrtohen çështje të rëndësishme, si përzgjedhja e kandidatëve për deputet dhe strategjia e fushatës elektorale. Pas diskutimeve, do të shpallen emrat e kandidatëve që do të përfaqësojnë PD-në në zonat zgjedhore të gjithë vendit.
Këto mbledhje do të shërbejnë si mundësi për anëtarët e Kryesisë dhe të Këshillit Kombëtar të diskutojnë dhe miratojnë listat e kandidatëve që do të paraqiten për votim dhe do të udhëhiqen nga Partia Demokratike në këtë proces zgjedhor.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
