Intervistat për kreun e SPAK, kandidatët shpalosin platformat (VIDEO)

Tre kandidatët në garë për kreun e Strukturës së Posaçme Antikorrupsion po zhvillojnë sot seancat dëgjimore në Këshillin e Lartë të Prokurorisë. Seanca ka nisur me intervistimin e kandidatit Altin Dumani.

Altin Dumani

“Është privilegj për mua të jem para jush dhe para publikut. Do të prezantoj para jush vizionin tim për drejtimin e SPAK-ut. Plani i detajuar është paraqitur pranë KLP-së. Ligji e ka rregulluar strukturën e SPAK dhe akti i parë është rregullorja e funksionimit të SPAK. Duket organizuar puna sipas specializimeve që kanë prokurorët. Duhet  emëruar drejtuesi i BKH sa më parë. SPAK do të synojë të ketë në administratën e saj njerëz profesionistë, me integritet të lartë. Do të jem shumë kërkues ndaj kritereve për përzgjedhjen e administratës. SPAK është maja e karrierës së çdo prokurori. Lidershipi i SPAK do krijojë frymën në gjithë institucionin. Punoj në grup, gjithë energjitë e mia për të nxitur dhe mbështetur punën në grup. Kam cilësitë e duhura për të drejtuar. Pika ime e forte është eksperienca e pasur 20-vjeçare në luftën kundër krimit të organizuar. Kam kaluar mbi 4000 dosje ku jam përballur me gjithë ngjarjet e mundshme në gjithë territorin. Kam organizuar shumë agjenci zbatimi të ligjit për kuftën kundër krimit të organizuar. Kam qenë 9 vjet i mbrojtur nga Policia e Shtetit, por kam vazhduar pa u trembur nga presionet. Kam një pikë të dobët: menaxhimi i kohës deri aty ku harroj çdo gjë tjetër dhe familjen për të përmbushur misionin tim”, ishte prezantimi i Dumanit.

Ndërkohë, sa i përket mënyrës se si do të funksionojë SPAK nën drejtimin e tij në rast të përzgjedhjes, Dumani u shpreh për ndarjen e prioriteteve.

“Pritet një fluks i lartë pune në SPAK me një numër të kufizuar prokurorësh. Kujdesi i parë është ngarkimi i panevojshëm i SPAK me lëndë të panevojshme për natyrën e saj. Prioritetet do të ndahen sipas seksioneve: prokurorë për hetim të korrupsionit dhe prokurorë për hetim të krimit të organizuar sipas specializimit të tyre. Gjithë stuktura të jetë e specializuar dhe të bashkëpunojë për një qëllim: përfaqësimi sa më i plotë i çështjes. Drejtuesi do të jetë në vijën e parë të hetimit, në çështje shumë të rëndësishme, të vështira, pa hequr dorë nga drejtimi i institucionit”, tha ai.  

Arben Kraja 

Pas Altin Dumanit, procesi i intervistimit ka vijuar me Arben Krajën, i cili prezantoi planin e tij nëse do të zgjidhet drejtues i Prokurorisë së Posaçme. Prokurori Arben Kraja vlerësoi punën e KLP për mënyrën profesionale dhe transparente në përzgjedhjen e prokurorëve për strukturën e posaçme SPAK, ndërsa renditi edhe eksperiencat e tij profesionale. Në fjalën e tij, kandidati Kraja shprehu mendimin e tij në lidhje funksionimin e SPAK, duke theksuar se sipas tij do të kemi 2 seksione: kundër krimit të organizuar dhe kundër korrupsionit të zyrtarëve të lartë. Ndërkaq, Kraja tha se “kemi dështuar në ndëshkimin e korrupsionit në nivel të lartë ose krimit të organizuar”, ndërsa e cilëson situatën si shqetësuese. I pyetur ne lidhje me plotësimin e vakancave të SPAK, kandidati Kraja argumentoi qëndrimin e tij se kemi dy mundësi ligjore për plotësim: drejtuesi mund te caktojë një prokuror të përkohshëm që plotëson kriteret për të ushtruar veprimtari në SPAK. E dyta, drejtuesi i SPAK mund t’i kërkojë Prokurorisë së Përgjithshme prokurorë për një detyrë specifike në SPAK. Gjithashtu, Kraja u pyet edhe për buxhetin e kësaj strukture dhe si do ta mbrojë në Parlament. Sipas tij, brenda 6 muajve te para do të ngrihet qendra e përgjimeve dhe do të kërkojë financim të rëndësishëm. Buxheti i shtetit ka parashikuar për 2020 një fond për rreth 100 punonjës apriori, investime etj.

Ervin Kondili

Ervin Kondili është kandidati i tretë dhe i fundit që garon në garën për kreun e SPAK. Pas intervistimit të dy kandidatëve të tjerë, edhe Kondili ka shpalosur vizionin e tij. Gjatë fjalës së tij kandidati Kondili u shpreh se ngritja e SPAK do të bazohet në objektiva konkrete dhe në afate sa më të shpejta, ndërsa krijimin e BKH e cilëson si plotësuese të SPAK. Ndërsa u shpreh në lidhje me hetimin e pasurive, Kondili mbajti qëndrimin se një qytetar që ka pasuri informale nuk është objekt i SPAK, por pasuria me origjinë kriminale. Ndërkaq, Kondili shtoi se hetimi pasuror duhet të ndiqet nga i njëjti prokuror që ndjek hetimin penal. Gjithashtu, as për kandidatin Kondili nuk munguan pyetjet e KLP. I pyetur nëse përbën rrezik për dekonspirim fakti që ligji parashikon bashkëpunim me forca të tjera policore përveç BKH, Kondili deklaroi se: “SPAK fillon nesër, BKH kërkon pak kohë për t’u formuar. Do të duhet bashkëpunim me Policinë e Shtetit me njerëz të emëruar posaçërisht për këtë bashkëpunim. Do të bashkëpunohet me agjenci të tjera policore sepse do të ketë nevojë për mbarëvajtjen e hetimit”. Mes të tjerash, kandidati Kondili u pyet edhe si do të vepronte si administrator i kësaj strukture. Në përgjigjen e tij, Kondili tha: “Drejtuesi nuk mund të ndërhyjë në pavaresinë e prokurorit. Drejtuesi është prokuror dhe si i tillë do të jetë mbështetje për këtë strukturë”.