Një ekzekutim me armë zjarri ka tronditur fshatin Bërxullë të Vorës pak pas mesnatës. Viktima është identifikuar si Edmond (Ali) Sula, 50 vjeç, i cili u qëllua për vdekje në momentin kur po afrohej pranë banesës së tij.
Ngjarja e rëndë ka ndodhur rreth orës 00:10 të datës 12 korrik. Sipas të dhënave paraprake nga grupi hetimor, autorët dyshohet se e kanë pritur 50-vjeçarin pranë banesës dhe kanë hapur zjarr në drejtim të tij, duke i shkaktuar vdekjen e menjëhershme.
Pas atentatit, autorët janë larguar nga vendi i ngjarjes. Burime nga hetimi bëjnë me dije se dyshohet që viktima të jetë qëlluar nga pas, me një plumb në kokë.
Pas sinjalizimit për ngjarjen, në Bërxullë kanë mbërritur shërbimet e policisë dhe një grup i posaçëm hetimor, i cili ka nisur punën për dokumentimin e provave dhe zbardhjen e rrethanave të plota të krimit.
Hetimet po drejtohen nga specialistët e sektorit për hetimin e vrasjeve, ndërsa janë sekuestruar edhe kamerat e sigurisë në zonë, me qëllim identifikimin e lëvizjeve të autorëve para dhe pas ekzekutimit.
Sipas burimeve policore, Edmond Sula nuk rezulton me precedentë penalë. Megjithatë, hetuesit po verifikojnë të kaluarën e tij, rrethin e kontakteve dhe çdo pistë të mundshme për të zbuluar motivin e vrasjes.
Një nga pistat që po shqyrtohet lidhet me aktivitetin e mëparshëm të viktimës në fushën e shitblerjes së pronave. Deri tani nuk ka persona të shoqëruar apo të arrestuar për ngjarjen, ndërsa policia vijon kontrollet dhe mbledhjen e provave për identifikimin dhe kapjen e autorëve.
Policia ka ngritur pika kontrolli në zonë dhe, nën drejtimin e Prokurorisë, grupi hetimor vijon punën për zbardhjen e plotë të kësaj ngjarjeje të rëndë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
