Rrëshqitje masive dheu në Kinë, vdesin 8 persona, zhduken dhjetëra të tjerë

Të paktën tetë persona kanë vdekur dhe dhjetëra janë zhdukur pasi një rrëshqitje dheu goditi provincën jugperëndimore të Kinës, Yunnan.

Rrëshqitja e dheut në qytetin Zhaotong ndodhi në orën 05:51 me orën lokale të hënën, duke bllokuar 47 persona.

Presidenti Xi Jinping ka urdhëruar një operacion shpëtimi “të gjithanshëm” në zonën që për momentin po përjeton edhe temperaturat nën zero.

Shkaku i rrëshqitjes së dheut mbetet i paqartë, por sipas BBC rajoni i largët malor është i prirur ndaj fenomeneve të tilla.

Pamjet me dron të vendit të fatkeqësisë të transmetuara nga media shtetërore lokale treguan një shpat të gjerë balte të errët të lëshuar mbi tarracat malore dhe çatitë e fshatrave të mbuluara me dëborë.

Më shumë se 300 punëtorë shpëtimi u vendosën së bashku me dhjetëra makina zjarrfikëse dhe pajisje për lëvizjen e tokës.

Më shumë se 500 njerëz u evakuuan nga shtëpitë e tyre dhe rreth 1000 punonjës shpëtimi u dërguan në zonë.

“Ishte shumë zhurmë dhe pati edhe një lëkundje, u ndje si një tërmet i madh”, tha një prej banorëve të zonës.

Sipas Administratës Meteorologjike të Kinës, pjesa më e madhe e Kinës jugore, përfshirë Yunnanin, është në mes të një krize të ftohtë, me temperatura që bien afër ose nën zero.