Covid-19, mosha nuk është më barrierë për virusin

Barriera që mendohej se mbronte të rinjtë nga koronavirusi duket se ka rënë. Mosha nuk është më një element që shton apo ul shanset e prekjes nga Covid-19. Me kalimin e kohës, profili i pacientit me Covid-19 po ndryshon dhe të dhënat e fundit tregojnë se mosha mesatare e rasteve të reja është në rënie.

Në Shqipëri, sot u shënua vdekja në moshë më të re nga infeksioni. Një 21-vjeçare, e cila vuante nga sindromi metabolik, ndërroi jetë pasi gjendja e saj u përkeqësua në mënyrë të menjëhershme. Rënien e moshës mesatare të të prekurve e konfirmoi mbrëmë në një intervistë për TvT edhe kryetarja e Komitetit të Ekspertëve, Mira Rakacolli. Aktualisht, mosha mesatare e të prekurve qëndron në 40-45 vjeç, ndërkohë që disa javë më parë ishte mbi 65 vjeç. Rakacolli e shpjegon këtë me faktin se ka një ndërgjegjësim të të moshuarve për rrezikun që paraqet për ta virusi dhe shkujdesjen e moshave më të reja.

Një fenomen i tillë po ndodh në shumë vende. Në Itali, një nga vendet më të goditura nga epidemia, por që tashmë e ka kufizuar shkallën e përhapjes, të dhënat e Institutit të Lartë të Shëndetësisë tregojnë se mosha mesatare e të prekurve ka zbritur në 47 vjeç. Në kulmin e pandemisë, ajo ka qenë të paktën mbi 60 vjeç. Por tashmë, kjo fashë përbën vetëm 18% të të prekurve. Ndërsa ka një rritje të përhapjes së virusit te moshat 19-50 vjeç, të cilat përbëjnë 47.5% të rasteve. Nuk janë pak as rastet e fëmijëve dhe adoleshentëve (0-18 vjeç) që përbëjnë 10.2%. Mosha 51-70 vjeç përbëjnë 24.3% të të prekurve.

Luigi Bertinato, drejtues i sekretarisë shkencore në Institutin e Lartë të Shëndetësisë, thotë se panorama aktuale duhet të na shërbejë që të përgatitemi për vjeshtën.

Sipas studiuesit, edhe nga pikëpamja klinike, shifrat kërkojnë reflektim: “Muajin e fundit, Covid-19 ka qenë më e vështirë të zhduket te pacientët, të cilët ende nuk i kanë mbushur 50 vjeç, ndërsa më parë, rastet më kritike ishin më shumë se 60 vjeç”.