Pas seancës së jashtëzakonshme për Vettingun në parlament, kryeministri Edi Rama tha se ka vetëm një forcë politike që sot nuk i ka bërë bisht reformës dhe ajo është Partia Socialiste.
I pyetur nga gazetarët në lidhje me fushatën, kreu i qeverisë u shpreh se kjo ishte fushata më e qetë që kishte parë ndonjëherë, por e vetmja gjë që Ramës i është dukur e çuditshme është pjesëmarrja e Presidentit në fushatë, duke thumbuar sërish Metën.
“Fushatën e kanë parë të gjithë, është fushata më e qetë që është bërë që kur mbaj mend unë, nga pikëpamja e retorikës, e mos ndotjes mjedisit, se i kemi ndalur banerat e posterat që e kanë tensionuar situatën. Palët thumbohen me njëra-tjetrës dhe ndonjëherë e kalojnë cakun por brenda normalitetit. S’ka ndodhur në këtë fushatë. Ajo që e ka bërë të çuditshme fushatën, është futja e Presidentit në fushatë. Unë kam shpjeguar se pse na duhet një fuqi e plotë, jo për më shumë pushtet po për ta bërë punën si duhet. Unë e futa PD-në në zgjedhje, ia arritëm këtë, Shqipëria fitoi nga marëveshja, dhe fituan dhe shqiptarët. Dhe për këtë meritë të PS-së, shqiptarët duhet ta votojnë për provuar se si punon një parti e vetme,” tha Rama.
Kryeministri tha se të gjitha pengesat u kapërcyen dhe se na sot nis zbatimi i reformës në drejtësi duke paralajmëruar gjykatësit dhe prokurorët e korruptuar se i kanë orët e numëruara.
“Jam shumë i lehtësuar sot sepse të gjitha pengesat e natyrshme apo artificiale u kapërcyen. U provua se diçka që i vjen koha nuk ka forcë e ndal. Nga sot fillon zbatimi i reformës. Orët për gjykatësit e prokurorët e korruptuar janë të numëruara. Ajo që është e rëndësishme nga ky proces është se gjykatësit dhe prokurorët që do dalin të pastër nga filtri i vettingut nuk do t’ia kenë për nder siç ia kanë pasur dhe jam i bindur se sot është çelur falë këtij procesi porta e drejtësisë së re. Sigurisht do kërkojë kohën e vet, vullnet të madh dhe një garant që është PS-ja”, deklaroi Rama.
Kreu i qeverisë është pyetur nga gazetarët nëse është optimist për zgjedhjet e 25 qershorit, duke qenë se edhe aleati i tij LSI, deklaron se do jetë forcë e parë.
Por kryeministri Rama nuk e ka përmbajtur dot veten dhe ka plasur me të qeshura para gazetarëve dhe kamerave duke mos dhënë asnjë përgjigje tjetër, të paktën verbale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
